თბილისში, რუსთაველის გამზირზე მდებარე 9 აპრილის მემორიალთან მოქალაქეები იკრიბებიან და 29 წლის წინ მომხდარი ტრაგედიისას დაღუპულებს იხსენებენ. ამის შესახებ 1TV წერს.
მემორიალი ყვავილებით შეამკეს „ქართული ოცნების“ ახალგაზრდული ორგანიზაციის წარმომადგენლებმა, ასევე „თავისუფალი დემოკრატების“ ახალგაზრდულმა ფრთამ. პარლამენტის წინ მდებარე მემორიალთან იმყოფებოდა „ნაციონალური მოძრაობის“ საკრებულოს დეპუტატი ლევან ხაბეიშვილიც.
დღეს 1989 წლის 9 აპრილის ტრაგედიიდან 29 წელი შესრულდა. ამ დღეს, გამთენიისას, საბჭოთა კავშირის შეიარაღებული ძალების ნაწილებმა თბილისში, რუსთაველის გამზირზე, მშვიდობიანი საპროტესტო აქცია დაარბიეს, რასაც 21 ადამიანის სიცოცხლე შეეწირა.
