ქართულ ბაზარზე მედიაჰოლდინგი „გაზპრომ მედია“ შემოდის, რომელიც საქმიანობას ბრენდით NTV-PLUS გეგმავს. ამის შესახებ კომპანიამ ოფიციალური განცხადება გააკეთა.
კომპანიის პარტნიორი საქართველოში შპს „მედია ჯგუფი“ იქნება, რომლის წილებს დავით ნაკაშიძე და გულნარა ხეჩოშვილიფლობენ. ეს კომპანია „გაზპრომ მედიასთან“ წინა წლებშიც თანამშრომლობდა NTV-PLUS-ის არხების ექსკლუზიური დისტრიბუტორი იყო.
NTV-PLUS-ის გენერალურმა დირექტორმა განაცხადა, რომ საქართველოში შემოსვლა არ უკავშირდება მხოლოდ ბიზნეს ინტერესებს.
„გეოგრაფიული ექსპანსია ჩვენს სტრატეგიულ პრიორიტეტებს შორისაა. საქართველო, რა თქმა უნდა, პერსპექტიული ბაზარია, მაგრამ მაუწყებლობის დაწყებას ჩვენ მხოლოდ ბიზნეს-ქეისად არ განვიხილავთ. ეს ჩვენთვის დიდწილად სოციალური მისიაც არის. მომავალში ჩვენ არ გამოვრიცხავთ დსთ-ს ქვეყნების ბაზარზე შესვლასაც, სადაც ტექნიკურად შესაძლებელი იქნება NTV-PLUS-ის სიგნალის მიღება“, – აღნიშნა მიხაილ დიომინმა.
რუსული კომპანია გეგმავს ქართველი მაყურებლისთვის ორი პაკეტის შეთავაზებას. პირველში 50-მდე არხი შევა, მეორეში კი 90-ზე მეტი. NTV-PLUS-ში ხაზს უსვამენ გარემოებას, რომ საქართველოს ტერიტორიის ნაწილში სატელევიზიო სიგნალის მიღება მხოლოდ სატელიტის მეშვეობითაა შესაძლებელი.
