მეცნიერებმა ახალი პროდუქტი გამოიგონეს, რომელსაც კბილის ემალის ხელახალი გაზრდის წახალისება შეუძლია, რაც იმას ნიშნავს, რომ კბილის კარიესის მკურნალობის გზა შესაძლოა სრულიად შეიცვალოს.
ვაშინგტონის უნივერსიტეტის მკვლევრებმა სამკურნალო საშუალება პეპტიდების საფუძველზე შექმნეს — პეპტიდის ბმებით დაკავშირებული ამონომჟავების მოკლე ჯაჭვით. თუმცა, მათ საკმარისი სიგრძე არ აქვთ იმისათვის, რათა სრულ ცილებად ჩაითვალოს.
როდესაც ლაბორატორიაში ხელოვნურად წარმოქმნილ კბილის დაზიანებებს მოარგეს, პროდუქტმა კბილის ემალის ხელახლა მინერალიზაცია მოახდინა და დაზიანებას ეფექტიანად „უმკურნალა“.
ახალი საშუალების შესაქმნელად, ჯგუფმა ამელობლასტების მიერ წარმოქმნილი ერთ-ერთი ცილა აიღო. ამელოგენინების სახელით ცნობილი ეს ცილები კბილის ემალის წარმოქმნის რეგულირებაში გადამწყვეტ როლს თამაშობენ.
ჯგუფმა პეპტიდები ამ ცილისგან ააწყო და შექმნა სამკურნალო საშუალება, რომელშიც პეპტიდები აქტიური ინგრედიენტის როლს ასრულებენ. ამის შემდეგ, ლაბორატორიაში ის კბილის დაზიანებებს მოარგეს. აღმოჩნდა, რომ მისი დახმარებით, დემინერალიზებულ ზონებში წარმოიქმნა ახალი მინერალიზებული ფენა, რომელიც ემალის ქვეშ ინტეგრირდა.
იმისათვის, რათა დადგინდეს, ეფექტიანია თუ არა მკურნალობის ეს საშუალება ლაბორატორიის გარეთ, ადამიანის პირის ღრუში, დამატებითი ტესტების ჩატარებაა საჭირო. მაგრამ, როგორც ჩანს, ღრმა ღრმულებისთვის, რომლებიც ემალის ქვეშ, დენტინში აღწევს, გაბურღვა და პლომბირება კვლავ ერთადერთი საშუალება იქნება.
მკვლევრებს სჯერათ, რომ მათი პროდუქტი პრევენციულ საშუალებად გაიყიდება. სავარაუდოდ, ეს იქნება კბილის პასტა ან გელი, რომელიც ემალის მცირე დაზიანებების შემთხვევაში, სტომატოლოგთან ვიზიტს თავიდან აგაცილებთ.
ნინო ზარიძე
