საქართველოს ტურისტული პოტენციალი თანდათან იზრდება, უცხო ქვეყნის მოქალაქეები ჩვენი სამშობლოს შესახებ დღითიდღე მეტს იგებენ. პროცენტულად, ყველაზე მეტი ტურისტი საქართველოს გაზაფხულ-ზაფხულის პერიოდში სტუმრობს. რამდენად გაზრდილია შემოსული ტურისტების რაოდენობა და რომელი ქვეყნებიდან არის ძირითადი შემომსვლელი, რამდენი ტურისტის შემოსვლას ელოდებიან წელს ზაფხულში, ამ კითხვებით, „თბილისი თაიმსი“ საქართველოს ტურიზმის ეროვნული ადმინისტრაციას დაუკავშირდა.
როგორც ადმინისტრაციაში ჩვენთან საუბრისას აღნიშნეს, მნიშვნელოვანი ზრდა სწორედ იმ ქვეყნებიდან ფიქსირდება, სადაც საქართველოს ტურიზმის ეროვნული ადმინისტრაციის მარკეტინგული კამპანიები ხორციელდება.
,,2018 წლის აპრილში საერთაშორისო მოგზაურების რაოდენობამ 596,703 შეადგინა, ზრდა წინა წლის ანალოგიურ პერიოდთან შედარებით-16.8%-ია. მთლიანი რაოდენობიდან 24 საათი და მეტი დროით, ტურისტების 278,032 (+24.9%) ვიზიტი განხორციელდა, ხოლო ტრანზიტის მიზნით 136,666, დანარჩენი ერთდღიანი ვიზიტების რაოდენობამ 182,005 შეადგინა.
საერთაშორისო მოგზაურებს შორის კვლავ მეზობელი ქვეყნები ლიდერობენ, მათზე მთლიანი შემოსვლების 80.7% მოდის. ევროკავშირიდან მოგზაურების რაოდენობა 5.2%-ს შეადგენს. მთლიანობაში, საერთაშორისო მოგზაურების რაოდენობის ზრდა 88 ქვეყნიდან აღინიშნა, რაც რაოდენობრივად 100,105-ს შეადგენს.
პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, აპრილის თვეში გამოირჩნენ: ესტონეთი +83%, ლატვია +82.6%, პოლონეთი +37.3%, გაერთიანებული სამეფო +33.6%, ნიდერლანდები +29.1% და საფრანგეთი +24.7%. განსაკუთრებული ზრდა დაფიქსირდა შემდეგი ქვეყნებიდან ირანი +98.5%, ქუვეითი +80.9%, ჩინეთი +62%, რუსეთი +43.4%, ისრაელი +28%.
ევროკავშირიდან შემოსული მოგზაურების უმრავლესობა საჰაერო გზით შემოდის. საჰაერო საზღვარზე ევროკავშირიდან შემოსული მოგზაურების 81.9% მოდის. ყველაზე მცირე რაოდენობა კი სარკინიგზო (1.3%) და საზღვაო ტრანსპორტით შემოდის (1.1%). ევროკავშირიდან შემოსული მოგზაურების უმრავლესობა საქართველოში თბილისის აეროპორტით შემოვიდა (53.17%), შემდეგ მოდის ქუთაისის აეროპორტი (27.2%), სადახლო (6.77%) და სარფი (4.79%) სასაზღვრო პუნქტი“-განაცხადეს საქართველოს ტურიზმის ეროვნულ ადმინისტრაციაში.
ნინო ზარიძე