დილით ადამიანები სამსახურში მიიჩქარიან, საღამოს კი, მუშაობით დაღლილებს, ერთი სული აქვთ სახლის კარს როდის შეაღებენ. ორივე შემთხვევაში მათ გადაადგილების რაიმე საშუალება სჭირდებათ. სწორედ ამიტომაა, რომ დილა-საღამოს მოძრაობა ძალზედ გადატვირთულია. დედაქალაქის ყოველ კუნჭულში, მით უფრო, ცენტრალურ უბნებში, ე.წ . საცობების პრობლემაა.
უფრო კონკრეტულად, რა იწვევს საცობს?- ორმო, სავალ ნაწილში ახდილი ჭა, გატეხილი ასფალტი, არასწორად დამონტაჟებული შუქნიშანი… ამგვარი წვრილმანები შესაძლოა ქუჩაში ერთ ადგილას საათობით დგომის მიზეზი გახდეს. სწორედ ამიტომ, ქალაქის დაგეგმარება და ინპრასტრუქტურის მოწესრიგება ერთ-ერთ უპირველეს საზრუნავს უნდა წარმოადგენდეს.
იმის გასარკვევად, თუ რა ღონისძიებები ტარდება თბილისში, ამ პრობლემბის აღმოსაფხვრელად თჰე თბილისი თიმეს დედაქალაქის მერიას დაუკავშირდა.
თბილისის მერია: ,,უკანასკნელი 5 წლის განმავლობაში, ათამდე ქუჩასა და მაგისტრალზე, სატრანსპორტო საშუალებების ცალმხრივი მოძრაობა დაწესდა. უსაფრთხოების კუნძულები მოეწყო 34 ქუჩასა და მაგისტრალზე, დამონტაჟდა 10 ათასზე მეტი საგზაო ნიშანი, შუქნიშნის 70 ობიექტი, 3 ათასზე მეტი გრძივი მეტრი ლითონის ძელებიანი ზღუდარი, 4 ათასზე მეტი ბოძკინტი, 95 ცალი უსაფრთხოების სფერული სარკე და 30 ათასზე მეტი გრძივი მეტრი მოძრაობის სიჩქარის შემაფერხებელი ხელოვნური დაბრკოლება. ასევე, გზაჯვარედინების გამტარუნარიანობის გაუმჯობესების მიზნით საგზაო მოძრაობის მართვისა და კონტროლის ავტომატიზებული სისტემის მშენებლობა მიმდინარეობს. საგზაო მოძრაობის მონაწილეთა უკეთ ორიენტირების მიზნით დედაქალაქის ქუჩებსა და მაგისტრალებზე ყოველწლიურად 130 ათას კვადრატულ მეტრზე მეტი ჰორიზონტალური და 40 ათას კვადრატულ მეტრზე მეტი ვერტიკალური საგზაო მონიშვნები დაიტანება.
სატრანსპორტო საშუალებების უსაფრთხო და შეუფერხებელი მოძრაობის უზრუნველყოფის, მოძრაობაში შეფერხებების თავიდან აცილების მიზნით, მიმდინარე წლის განმავლობაში 3 ათასზე მეტი საგზაო ნიშნის, 1000 ცალი ბოძკინტის, 25 ცალი სფერული სარკის, 2750 გრძივი მეტრი მოძრაობის სიჩქარის შემაფერხებელი ხელოვნური დაბრკოლების, 5 ათასზე მეტი შუქამრეკლის, შუქნიშნის 15 ობიექტის მონტაჟი და 121 ათასი კვადრატული მეტრი ჰორიზონტალური საგზაო მონიშვნის დატანა იგეგმება“- განაცხადეს თბილისის მერიაში.
როგორც თბილისის მერიის განცხადებიდან ვიგებთ, დედაქალაქში მოძრაობის განსატვირთვად სხვადასხვა ღონისძიებები ტარდება, მაგრამ ფაქტი ერთია – თბილისში საცობების პრობლემა კვლავაც გადაუჭრელი რჩება.
ნინო ზარიძე
