„დღევანდელი შეხვედრა ჯერ კიდევ ერთი თვის წინ დაიგეგმა, როდესაც მეგობრობის ჯგუფის დელეგაცია ბუქარესტში სამუშაო ვიზიტით ვიმყოფებოდით. რუმინეთის მთავრობის და პარლამენტის წარმომადგენლებთან შეხვედრისას რამდენიმე მნიშვნელოვანი ერთობლივი პროექტი განვიხილეთ და ერთ-ერთი პრიორიტეტულ მიმართულებად საქართველო-რუმინეთს შორის პირდაპირი ავიამიმოსვლა გამოიკვეთა. დღეს შევხვდით რუმინეთის ავიაკომპანიის წარმომადგენლებს, რომლებმაც შეხვედრები უკვე გამართეს თურქული კომპანია „ტავის“ და საქართველოს აეროპორტების გაერთიანების წარმომადგენლებთან. ფაქტიურად ყველა დეტალი გადაწყვეტილია და პირდაპირი ავია ფრენების დაწყებას ივლისიდან ველოდებით“, – განაცხადა პარლამენტის წევრმა ისკო დასენმა.
პარლამენტში გამართულ შეხვედრას რუმინეთის საგანგებო და სრულუფლებიანი ელჩი რადუ-ლივიუ ჰორუმბა დაესწრო.