საქართველოში მსოფლიო მნიშვნელობის ტურიზმის სკოლა დაარსდება

საქართველოს განათლებისა და მეცნიერების მინისტრი მიხეილ ჩხენკელი, ტურიზმის მიმართულებით მსოფლიოში ლიდერი სკოლის le Roshes-ს პრეზენტაციას დაესწრო.

მიხეილ ჩხენკელის თქმით, Les Roche-ის ტურიზმისა და სტუმარ-მასპნძლობის სფეროში მსოფლიო ლიდერი სკოლის საქმიანობა, საქართველოში ხელს შეუწყობს ტურიზმის სექტორში დასაქმებულთა ცოდნისა და კვალიფიკაციის ზრდას და დარგის კიდევ უფრო განვითარებას.

„მადლობას ვუხდი ყველას, ვინც ძალისხმევა არ დაიშურა ამ პროექტის განსახორციელებლად – ბიზნესისა და ტექნოლოგიების უნივერსიტეტს, ტურიზმის ეროვნულ ადმინისტრაციასა და მსოფლიო ტურიზმის ორგანიზაციას.

პირადად ჩემი და სამინისტროს სახელით მხარდაჭერას გპირდებით თქვენს უაღრესად მნიშველოვან საქმიანობაში და შემდგომ წარმატებებს გისურვებთ“ – განაცხადა მინისტრმა.

le Roshes ბიზნესისა და ტექნოლოგიების უნივერსიტეტის (BTU) ბაზაზე, სასტუმროების მენეჯმენტის საერთაშორისო პროგრამით დაიწყებს ფუნქციონირებას, რაც მსურველებს შესაძლებლობას მისცემს მიიღონ მაღალი დონის საერთაშორისო განათლება ტურიზმის მიმართულებით.

პირველ ეტაპზე, პროგრამა განკუთვნილია ტურიზმის სფეროში დასაქმებული საშუალო და მაღალი რგოლის მენეჯერებისთვის, რომელთა მომზადების პროცესში ჩართულები იქნებიან le Roshes-ს პრაქტიკოსი ლექტორები და სპეციალისტები. ხოლო მეორე ეტაპზე, ბიზნესისა და ტექნოლოგიების უნივერსიტეტში, le Roshes-ისა და მსოფლიო ტურიზმის ორგანიზაციის მხარდაჭერით, დაფუძნდება ტურიზმის სკოლა, სადაც მომზადდებიან ქვედა და საშუალო რგოლის კადრები. ახალი თანამშრომლობა უზრუნველყოფს ბაზრის მოთხოვნის შესაბამისი, მაღალი კომპეტენციის მქონე კადრების მომზადებას, რაც ხელს შეუწყობს საქართველოს ტურისტული პოტენციალის სრულად ათვისებასა და ტურიზმის შემდგომ განვითარებას.

le Roshes-ს მსოფლიო აღიარება მოუტანა ინოვაციურმა საგანმანათლებლო პროგრამებმა, რაც პრაქტიკისა და თეორიის სინთეზს ეფუძნება. 2018 წელს, დამსაქმებელი ორგანიზაციების მიერ le Roshes ტურიზმის ინდუსტრიაში ლიდერად დასახელდა.