„თბილისის მიკროავტობუსი“ სპეციალურ განცხადებას ავრცელებს, რომელშიც მგზავრებს მოუწოდებს, მიკროავტობუსში მძღოლების მიერ კონდენციონერების ჩაურთველობის შემთხვევაში ცხელ ხაზზე დარეკონ.
“გაცნობებთ, რომ დღეიდან, 25 ივნისიდან კომპანიის მენეჯმენტმა გასცა განკარგულება მიკროავტობუსებში კონდენცირების სისტემის ჩართვასთან დაკავშირებით. მოგახსენებთ, რომ მიმდინარე წლის მარტის თვიდან “თბილისის მიკროავტობუსის” მიერ გაგრილების სისტემის შეკეთება-გამოცვლისთვის დახარჯულმა თანხამ 480 000 ლარი შეადგინა. კომპანია სრული პასუხისმგებლობით აცხადებს, რომ მგზავრების გადასაყვანად ხაზზე გასულ ყველა მიკროავტობუსში კონდენციონერი მუშაობს და უმორჩილესად ვთხოვთ ყველა მომხმარებელს, მიკროავტობუსში გაგრილების სისტემის ჩაურთველობის შემთხვევაში სატრანსპორტო საშუალების სახელმწიფო ნომერი შეგვატყობინოს ცხელ ხაზზე 032 2 200 340; ასევე, გაცნობებთ, რომ კონდენცირების სისტემის ჩართვით მომატებულ საწვავის ხარჯს “თბილისის მიკროავტობუსი” ანაზღაურებს კომპანიის ბიუჯეტიდან და ყველა ის მძღოლი, რომელზეც მონიტორინგის სამსახური განსაკუთრებით ცხელ დღეებში არ დააფიქსირებს მომხმარებლის მხრიდან პრეტენზიებს, წახალისებული იქნება კომპანიის მიერ“, – აცხადებენ „თბილისის მიკროავტობუსში“.
კალაძემ თბილისის მერის მოადგილე მაია ბითაძეს და სატრანსპორტო სამსახურის ხელმძღვანელს მამუკა მუმლაძეს ე.წ. ყვითელ “მარშრუტკებში” კონდიცირებასთანდაკავშირებით კომპანიასთან მოლაპარაკებები 16 მაისს მთავრობის სხდომაზე დაავალა.
