საქართველოს პრემიერმინისტრმა მამუკა ბახტაძემ დღეს მცირე მთავრობის ახალი შემადგენლობა დაასახელა. მინისტრთა კაბინეტში სამი ახალი სახეა: განათლების მინისტრი მიხეილ ბატიაშვილი, ფინანსთა მინისტრი ივანე მაჭავარიანი და ეკონომიკის მინისტრი გიორგი ქობულია.
განათლების მინისტრობის კანდიდატმა მიხეილ ბატიაშვილმა მისი უწყების პრიორიტეტები დაასახელა. მისი თქმით, რეფორმები განათლების ხუთივე საფეხურზე უნდა გატარდეს.
“განათლება, მეცნიერება, კულტურა და სპორტი ის სფეროებია, რომელიც ხელს უნდა უწყობდეს ადამიანური კაპიტალის ჩამოყალიბებას და განვითარებას. ამიტომ ერთ-ერთი მთავარი მიმართულება იქნება ძირეული ცვლილებები, რეფორმების გატარება განათლების ხუთივე საფეხურზე, რომელმაც უნდა მოგვცეს ახალი სისტემა,რაც დაფუძნებული იქნება ტექნოლოგიებსა და ინოვაციებზე. ტექნოლოგიებისა და ინოვაციების გარეშე წარმოუდგენელია ჩვენი ეკონომიკის განვითარება, ჩვენი ახალგაზრდების წარმატება. ყველა სფეროში გატარდება მნიშვნელოვანი რეფორმები, რომელიც დაიწყება უმოკლეს პრიოდში და ორიენტირებული იქნება სწრაფ შედეგებზე და გრძელვადიან ეფექტზე, რომელმაც უნდა მოგვცეს ის ადამიანური კაპიტალი, რომელიც ორიენტირებული იქნება ჩვენი ქვეყნის განვითარებაზე. გვაქვს გეგმა, ვიცით რა ნაბიჯები უნდა გადავდგათ”, – განაცხადა მიხეილ ბატიაშვილმა.
