სასტუმრო “თბილისი მარიოტში” ხვალ TEEB-ის ინიციატივის ფარგლებში განხორციელებული წინასწარი კვლევის შედეგების პრეზენტაცია გაიმართება. ღონისძიებაში გაეროს გარემოსდაცვითი პროგრამის (UNEP) კეთილი ნების ელჩი და TEEB-ის ინიციატივის ლიდერი პავან სუხდევი, გარემოსა და ბუნებრივი რესურსების დაცვის მინისტრი ხათუნა გოგალაძე, ეკონომიკისა და მდგრადი განვითარების მინისტრი გიორგი კვირიკაშვილი, ასევე სოფლის მეურნეობის მინისტრი შალვა ფიფია, რეგიონული განვითარებისა და ინფრასტრუქტურის მინისტრი დავით ნარმანია, ფინანსთა მინისტრის მოადგილე დავით ლეჟავა და ენერგეტიკის მინისტრის მოადგილე მარიამ ვალიშვილი მიიღებენ მონაწილეობას.
პრეზენტაციას გაეროს გარემოსდაცვითი პროგრამის სხვა მაღალი რანგის წარმომადგენლებიც დაესწრებიან.
TEEB – ეკოსისტემებისა და ბიომრავალფეროვნების ეკონომიკა (The Economics of Ecosystems and Biodiversity) – ერთ-ერთი უმნიშვნელოვანესი საერთაშორისო ინიციატივაა, ხოლო საქართველო მისი ერთ-ერთი პირველი საპილოტე ქვეყანაა.
ინიციატივის მიზანია საზოგადოების სხვადასხვა ჯგუფისათვის, მათ შორის გადაწყვეტილების მიმღებების, ბიზნესის წარმომადგენლებისა და სხვა მხარეებისთვის ბიომრავალფეროვნებისა და ეკოსისტემური სერვისების მნიშვნელობის უკეთ გაცნობა.
შეხვედრის ფარგლებში ასევე დაგეგმილია საქართველოს მიერ მომდევნო ეტაპის – TEEB-ის სრული კვლევის განხორციელების შესაძლებლობების განხილვა.
ღონისძიება გარემოსა და ბუნებრივი რესურსების დაცვის სამინისტროსა და გაეროს გარემოსდაცვითი პროგრამის მიერ არის ორგანიზებული.
30.09.13
