სამორინეების მსგავსად, თამბაქოს მოხმარებაზე გამონაკლისი შესაძლოა, სათამაშო აპარატების სალონზეც გავრცელდეს. შესაბამისი ცვლილებები „თამბაქოს კონტროლის შესახებ“ კანონში შედის, რომლის ინიციატორი პარლამენტის ჯანდაცვის კომიტეტია.
პარლამენტის ჯანდაცვის კომიტეტის თავმჯდომარე აკაკი ზოიძე პირველ არხთან საუბარში განმარტავს, რომ საუბარია იმაზე, სამორინეებთან ერთად, გავრცელდეს თუ არა გამონაკლისი სათამაშო კლუბებზეც – „სლოტ კლუბებზე“. კერძოდ, მათზე, რომელთაც შესაბამისი ბარიერი და ლიცენზიის მაღალი საფასური აქვთ გადასახდელი.
კანონპროექტის განმარტებით ბარათში აღნიშნულია, რომ საგამონაკლისო წესში მოექცევა სათამაშო აპარატების სალონი, რომლის მოწყობის ნებართვისთვის დადგენილია სანებართვო მოსაკრებელის განაკვეთი არანაკლებ 200 000 ლარის ოდენობით.
მოქმედი კანონით, სათამაშო აპარატების სალონი თამბაქოს მოხმარების წესების დარღვევის შემთხვევაში 500 ლარით ჯარიმდება, ცვლილებებით კი კონკრეტდება, რომ იურიდიული პირი ამ ქმედებისთვის აღარ დაჯარიმდება.
„ზოგადად გეტყვით, რომ გამონაკლისი, რომელიც სამორინეებს ეხება, სისუსტეა, მაგრამ ამ ეტაპზე ამის დაშვება იმიტომ მოხდა, რომ ქვეყანას უცხოელები სტუმრობენ. ჩვენი სამორინეები კონკურენციას კვიპროსის სამორინეებს უწევენ და გამონაკლისიც ამიტომ იქნა დაშვებული. ამ გამონაკლისთა სიაში „სლოტ კლუბების“ შეყვანაზეა საუბარი“, – განაცხადა აკაკი ზოიძემ.
2018 წლის პირველი მაისიდან საზოგადოებრივი დანიშნულების ყველა შენობა-ნაგებობაში თამბაქოს მოწევა აიკრძალა, მათ შორის კაფეებსა და რესტორნებში. მოწევა შეიზღუდა გარე სივრცეებშიც, აიკრძალა თამბაქოს რეკლამა და სპონსორობა.
პირველი სექტემბრიდან ამოქმედდა თამბაქოს რეალიზაციისა და განთავსების წესების ახალი რეგულაციები. კანონის თანახმად, აკრძალულია თამბაქოს ნაწარმის, თამბაქოს აქსესუარის ან თამბაქოს მოხმარებისთვის განკუთვნილი მოწყობილობის რეალიზაცია და განლაგება ვიტრინაზე, ვიტრაჟზე, დახლზე, თაროზე ან სხვაგვარად, ისე, რომ იგი ხილვადი იყოს გარედან. დარღვევაზე ჯარიმა 2 000 ლარი, განმეორებისას კი 4 000 ლარია.
ნინი მაზიაშვილი
