თბილისში 2019 წლის გაზაფხული/ზაფხულის სეზონის მთავარი სიახლე და მესიჯი ეკო მოდაა. მაშინ როდესაც ახლახანს ბარბერიმ 38 მილიონი დოლარის სამოსი გაანადგურა და გადასაყრელად აქცია, როდესაც დადგა მოდის ტექნოლოგიური ლაბორატორიების შექმნის აუცილებლობა, რადგან ერთ დღესაც ინდუსტრიამ გაიღვიძა და გაიაზრა, რომ ნავთობის შემდეგ მსოფლიოში ყველაზე დამაბინძურებელი სწორედ მოდა და ვიზუალური ინდუსტრიებია, ეკო მოდის წინ წამოწევა გონივრული ჩავლებაა ორგანიზატორების მხრიდან. ტრადიციულად, მოდის კვირეულის გახსნას დიდ ქართველ ქალბატონს მიუძღვნიან. ნინო რამიშვილის, სოფიკო ჭიაურელის, ელენე ახვლედიანის და მედეა ჯაფარიძის შემდეგ, პერფორმანსით ლეგენდარული ბელა მირიანაშვილის სტილი და ეპოქა გაცოცხლდება. ეტაპობრივად დაწვრილებით მოგაწვდით ინფორმაციას, თუ ზუსტად რას გულისხმობს თბილისის მოდის კვირეულის გაგებით ეკო მოდა, როგორ გავლენას მოახდენს ქართულ მოდაზე, რომელი პრესა ჩამოდის ამ სეზონზე საქართველოში და რას გვიმზადებენ ქართველი, უცხოელი დიზაინერები თბილისში SS 2019 სეზონზე.
