ადამიანები ძაღლებს სხვადასხვა ექსპერიმენტებისთვის ხშირად იყენებენ. ამ ცხოველის შესაძლებლობები მეცნიერებსაც კი აკვირვებთ და ისინი ცდილობენ ამოხსნან, თუ როგორ შეუძლიათ ძაღლებს დაიმახსოვრონ და იცნონ ადამიანები.
ცნობილია, რომ ძაღლებს ადამიანების სიტყვების გაგებაც შეუძლიათ, მეცნიერებმა იმის დასადგენად, თუ როგორ ახერხებენ ძაღლები გაიგონ ადამიანების ენა, კვლევა ჩაატარეს. მეცნიერებმა გამოიყენეს მოწყობილობა, რომელიც ძაღლების ტვინში მიმდინარე პროცესებს აღწერდა. კვლევის შესახებ სტატია ჟურნალმა Frontiers in Neuroscience-მა გამოაქვეყნა.
ექსპერიმენტში მონაწილეობისთვის 12 სხვადასხვა ჯიშის ძაღლი შეარჩიეს. თავიდან მათ ასწავლეს ორი საგნის დასახელებების გამოცნობა. თუკი ძაღლი პატრონის მიერ დასახელებულ საგანს ამოიცნობდა და პატრონს მიუტანდა, მას ტკბილეულით აჯილდოებდნენ. ამის შემდეგ ძაღლებს მაგნიტო-რეზონანსული ტომოგრაფია გადაუღეს და ნაცნობი საგნების ჩვენებისას ცხოველების ტვინის მოქმედებას დააკვირდნენ და მონაცემები ჩაიწერეს. ექსპერიმენტის შემდეგი ნაწილი უკვე ძაღლებისთვის უცნობ საგანს და უცნობ სიტყვას შეეხებოდა. პატრონი ძაღლს ამ უცნობი საგნის მიტანას სთხოვდა.
მეცნიერები ამბობენ, რომ ძაღლის ტვინში ამ დროს უცნაური რამ ხდებოდა. ცხოველის ტვინში უცნობი სიტყვის მოსმენისას ის უბნები, რომლებიც სმენაზეა პასუხისმგებელი განსაკუთრებულად აქტიურდებოდნენ, ვიდრე ნაცნობი საგნის მოსმენისას.
გაირკვა, რომ მსგავს სიტუაციაში განსხვავებულად რეაგირებს ადამიანის თავის ტვინი. ადამიანის თავის ტვინის შესაბამისი უბანი უფრო მეტად აქტიური ნაცნობი სიტყვების მოსმენისას არის.
ძაღლებისთვის ადამიანის ემოცია კიდევ უფრო მეტად გასაგებია და თუკი ნაცნობი სიტყვები ემოციით არის წარმოთქმული, ოთხფეხა მეგობრები მას უფრო კარგად იგებენ.
წყარო:imedinews.ge