21- საუკუნეში, სასურველია ის პროდუქტი, რომელიც ინდივიდუალურ გემოვნებასა და კონკრეტულ პიროვნულ მახასიათებლებს ერგება. სასურველი დიზაინით შექმნილი, განსაკუთრებულ ისტორიას ქმნის და ადამიანის ინტერესებს ყოველთვის უსვამს ხაზს.
დიდი ხანი არ გასულა მას შემდეგ, რაც ქართულ ბაზარზე „posteration-ი“ გამოჩნდა. 2016 წლის დეკემბერს – თითქმის, ორი წლის წინ, მან, საკუთარი პოსტერებითა და საინტერესო იდეებით, საკუთარი გულშემატკივრებისა და მომხმარებლების „დაგროვება“ დაიწყო.
„თბილისი თაიმსის“ შეკითხვებს „posteration-ის“ დამფუძნებელი, გური ხეცურიანი პასუხობს:
საიდან გაჩნდა ამ ბიზნესის იდეა?
ყოველთვის გვინდოდა, რომ ქართული საზოგადოებისთვის ახალი პროდუქტი და მომსახურება შეგვეთავაზებინა. ოთხმოცდაათიან წლებში, ალბათ, ყველას ახსოვს, თუ რა პოპულარული იყო პოსტერები. თითქმის ყველა ოჯახში, თუნდაც, ერთ ოთახში მაინც იყო ხოლმე გაკრული თუნდაც ერთი პოსტერი. რატომღაც, პოსტერების შეგროვების ტრადიცია აღარ არსებობდა და ჩვენ, პირველებმა, იგი კვლავ აქტუალური გავხადეთ.
რა პროდუქციას აწარმოებთ?
ჩვენი პირველი პროდუქტი იყო პოსტერი. შემდგომ, მალევე, 2-3 თვეში, ჩამოვაყალიბეთ ხის საამქრო, სადაც ვამზადებთ ხის ჩარჩოებს და დავამატეთ ახალი პროდუქტი – ტილო, რომელიც გადაჭიმულია ხის ჩარჩოზე. ასევე, ვამზადებთ ბლოკნოტებსა და სტიკერებს.
ვინ არის ძირითადი მომხმარებელი? ბევრია დაინტერესებული თქვენი პროდუქციით?
ჩვენი პროდუქტი თითქმის ნებისმიერ ასაკობრივ კატეგორიაშია პოპულარული. ჩვენი პროდუქტით ინტერესდება ყველა, ვისაც ინტერიერის გაფორმება უნდა: სახლის, საკუთარი ოთახის, თუ ოფისის… ასევე, პოსტერი და ტილო შესანიშნავი საჩუქარია. “პოსტერეიშენ” რამდენიმე მაღაზიასა და სასტუმროსაც კი აფორმებს.
ვის შეუძლია თქვენი მომსახურებით სარგებლობა?
ნებისმიერს, ვინც სოციალური ქსელით სარგებლობს, იქნება ეს facebook, თუ – instagram.
ვისი იდეებით ხდება პროდუქციის დამზადება?
დიზაინი მომხმარებლის სურვილზეა დამოკიდებული, ის არჩევს პროდუქტის ზომასაც. თუმცა, ჩვენ გვაქვს ფართო არჩევანი და შეგვიძლია, მათი სურვილის შემთხვევაში, ნებისმიერი თემატიკის გამოსახულება შევთავაზოთ.
კონკურენტად მიიჩნევთ ვინმეს?
როგორც აღვნიშნე, პირველი ქართულ ბაზარზე “პოსტერეიშენ” იყო. ბოლო დროს გამოჩნდა რამდენიმე კომპანია, რომელიც მომხმარებელს მსგავს პროდუქციას სთავაზობს, რამდენიმემ კი დაიმატა , შესაბამისად – არსებობენ..
როგორ ფიქრობთ, რამდენად ძლიერი ბიზნესგარემოა ჩვენს ქვეყანაში ამ ტიპის ბიზნესის წარმოებისთვის?
ვფიქრობ, საქართველოში ამ ტიპის ბიზნესისთვის და ,არა მხოლოდ, ამ ტიპის, კარგი გარემოა. მთავარია ინტერესისა და იმ ხარისხის შენარჩუნება, რომლის გამოც მომხმარებელმა აგირჩია.
მარიამ ტიელიძე
