„საქართველოს სათამაშო ბიზნესის ასოციაციასა“ და „თამბაქოს კონტროლის ალიანსს“ შორის სასამართლოა ჩანიშნული. შესაბამის პროცესს წინ რამდენიმეთვიანი უთანხმოება უძღოდა. ყველაფრის მიზეზი კი თამბაქოს შესახებ კანონში შეტანილი ცვლილებები, მოწევის აკრძალვა-არაკრძალვის იდეები და შესაბამისი შეზღუდვები გახლავთ.
„სათამაშო ბიზნესი ასოციაცია“ „თამბაქოს კონტროლის ალიანსს“ უჩივის სასამართლოში, რათა ამ უკანასკნელმა უარყოს საკუთარი განცხადება, რომ ეს ბიზნესი არის კრიმინალური, რადგან აქ ხდება ფულის გათეთრება და სხვა ქმედებები. ამ ყველაფერს, წინ უძღოდა ის, რომ „სათამაშო ბიზნესის ასოციაციამ“ მოითხოვა სამორინეების (კაზინოების) შემდგომ მოწევა დაშვებულიყო სათამაშო აპარატების სალონებსა (სლოტკლუბები) და ტოტალიზატორებში. „თამბაქოს კონტროლის ალიანსი“ კი ამის წინააღმდეგია.
გარკვეული პერიოდის წინ, საქართველოს სათამაშო ბიზნესის ასოციაციის“ თავმჯდომარემ, ზურაბ ბერუაშვილმა, ბატონ ირაკლი კობახიძეს, ასოციაციის სახელით, მიმართა ცნობით. ამ დოკუმენტის მიხედვით, „საქართველოს სათამაშო ბიზნესის ასოციაციის“ შეფასებით: „2018 წლის პირველი მაისიდან კანონის მოქმედი რედაქციით ამოქმედება გამოიწვევს სათამაშო ბიზნესის ბაზარზე კონკურენციის არამართლზომიერ შეზღუდვას, კერძოდ – ოპერატორი აგენტი, რომელსაც ყველა პროდუქტი თავმოყრილი აქვს ერთ სივრცეში, აღმოჩნდება, თითქმის, მონოპოლიურ გარემოში, ხოლო სხვა დანარჩენი აგენტები – გაკოტრების რეალური საშიშროების წინაშე, რამდენადაც თამბაქოს მოხმარება აზარტული, ან/და მომგებიანი თამაშების მოწყობის ადგილებში თითქმის აუცილებელი თანმდევი პროცესია“.
ასოციაციის შეფასებით: „თამბაქოს კონტროლის შესახებ საქართველოს კანონის მე-10 მუხლის ე ქვეპუნქტი აშკარა წინააღმდეგობაში მოდის საქართველოს კონსტიტუციის 30-ე მუხლის მე-2 პუნქტთან, რომლის მიხედვით „სახელმწიფო ზრუნავს თავისუფალი და ღია ეკონომიკის თავისუფალი მეწარმეობისა და კონკურენციის გავითარებაზე“.
„თამბაქოს კონტროლის ალიანსის“ თავმჯდომარის, გიორგი ბახტურიძის თქმით: „აპრილში, „სათამაშო ბიზნესის ასოციაციამ“, პარლამენტში წარადგინა საკანონმდებლო წინადადება. კანონი ძალაში, ამ წლის, პირველი მაისიდან შევიდა – ძალაში შევიდა, თამბაქოს მოწევის აკრძალვასთან დაკავშირებით, არაერთი რეგულაცია. მათ შორის, ერთერთი გამონაკლისი გახლდათ კაზინოებში მოწევის დაშვება – ანუ, კაზინოებში, დღევანდელი მდგომარეობით, მოწევა დაშვებულია. ამის წინააღმდეგი ჩვენ ვიყავით საპარლამენტო განხილვების დროს.
უკვე შუა აპრილში, „სათამაშო ბიზნესის ასოციაციამ“ წამოაყენა წინადადება, რომ კაზინოებთან ერთად რომ სლოტკლუბებიაო(კაზინოს რომ აქვს ლიცენზია აღებული, მას, ავტომატურად, სლოტკლუბის ლიცენზიაც აქვს), ჩვენ დავზარალდითო. ისინი ამას ამბობენ აპრილში და თვითონ კანონი ძალაში მოგვიანებით – მაისში შედის. ეს იყო ალოგიკური – ჯერ კანონი არ იყო ძალაში შესული და როგორ დააზარალებდა ვინმეს?
ჩვენ მაისში, პარლამენტში, გავაკეთეთ წინადადება და მოვითხოვეთ, რომ სამორინეებშიც, რომელთა მიმართაც ადრე იყო დათქმა, რომ აქ დროებით იყო მოწევა დაშვებული(პოლიტიკოსების გამოსვლებიც იყო) აქაც აკრძალულიყო მოწევა. ეს წინადადება ჩვენ შევიტანეთ პარლამენტში. მაგრამ ის არ დაკმაყოფილდა. სამაგიეროდ, დაკმაყოფილდა „სათამაშო ბიზნესის ასოციაციის“ ზემოხსენებული წინადადება. ჩვენ, როგორც „თამბაქოს კონტროლის ალიანსმა“, გავაკეთეთ განცხადება და ვთქვით ასეთი რამ: სათამაშო ბიზნესი, თავისი ბუნებით, არის კრიმინალური. რატომ არის კრიმინალური? ამასთან დაკავშირებით გვქონდა რამდენიმე ვარიანტი. აქ არის ძალიან დიდი შანსი ფულის გათეთრების და ეს ასეც ხდება. მეორე – საკუთარი მოთამაშეების გარკვეული ნაწილი მიყავს თვითმკვლელობამდე და მესამე – უკიდურეს სიღარიბეში აგდებს საკუთარი მომხმარებლის საკმაოდ დიდ ნაწილს“.
„თამბაქოს კონტროლის ალიანსი“ – „სათამაშო ბიზნესის შენობებში მოწევის დაშვების მოთხოვნას პარლამენტში სავარაუდოდ ლობირებენ ისკო დასენი, რომლის ვაჟი კნიაზ დასენი, გადამოწმებული ინფორმაციით, „კრისტალბეთის“ 22%-იანი წილის მფლობელია. ასევე, არსებობს გადაუმოწმებელი ინფორმაცია, რომ დეპუტატი დანელია სენაკში ფლობს სამსართულიან შენობას, რომელშიც განთავსებულია სათამაშო ბიზნესი. ამათ გარდა , კიდევ იქნებიან სხვები, თუმცა, ჩვენ მათი ვინაობა არ ვიცით.
თეატრებში, სპექტაკლის დროს მოწევის დაშვებას მოთხოვენ ნუკრი ალექსანდრე ქანთარია და ზაზა პაპუაშვილი. ღრმა ეჭვი გვაქვს, რომ მათ უკან „თამბაქოს ინდუსტრია“ დგას, რომელიც თეატრებში სპეკტაკლებს აფინანსებს“.
ზემოხსენებულ საკითხზე, „საქართველოს სათამაშო ბიზნესის ასოციაციასა“ და „თამბაქოს კონტროლის ალიანსს“ შორის სასამართლო 3 დეკემბერს შედგება.
მარიამ ტიელიძე
