ზამთრის მოყვარულებისთვის ჩვენი ქვეყნის კურორტები მიმზიდველი და ერთერთი საყვარელი ადგილია. როგორც აღიარებენ , საქართველო ზამთრის კურორტებს შორის საუკეთესოა ამიერ კავკასიის ტერიტორიაზე. რაც მთავარია, ყოველწლიურად იზრდება მისი პოტენციალი ამ თვალსაზრისით. იზრდება კურორტების რიცხვი, რომლებიც ტურისტებს და ადგილობრივ დამსვენებლებს მრავალფეროვან მომსახურებასა და კომფორტული დასვენებისთვის საჭირო პირობებს სთავაზობნ.
ზამთრის მოახლოებასთან ერთად სულ უფრო აქტუალური ხდება კითხვა- თუ რა ღირს დასვენება და კარგი დროის გატარება თოვლიან საკურორტო ზონებში .
როგორც ცნობილი გახდა გუდაურში საბაგიროთი სარგებლობა გაძვირდა. 2018 წლის 1-ლი დეკემბრიდან, 2019 წლის 10 მარტის ჩათვლით, გუდაურის საბაგიროს ერთდღიანი აბონიმენტის ღირებულება უფროსებისთვის 50 ლარი იქნება, შარშან მისი ფასი 40 ლარი იყო. ორდღიანი აბონიმეტი კი უფროსებისთვის, წინა წლის 80 ლარის ნაცვლად, 100 ლარი იქნება. რაც შეეხება სამდღიან აბონიმენტს, იგი შარშანდელი 112 ლარიდან 140 ლარამდე გაძვირდა. საბაგიროთი ერთი ასვლა კი, 7 ლარის ნაცვლად, 10 ლარი ეღირება. 15 დეკემბერს ზამთრის სეზონი ოფიციალურად იხსნება, საინტერესოა როგორი სეზონი გველის და როგორი იქნება ფასების დინამიკა 2019 წელს .
თბილისი თაიმსი ესაუბრა ეკონომისტს , ახალგაზრდა ფინანსისტთა და ბიზნესმენთა ასოციაციის ვიცე-პრეზიდენტს გიორგი კაპანაძეს.
– რა მნიშვნელობა აქვს ზამთრის კურორტებს ქვეყნის ეკონომიკური განვითარებისთვის და რამდენად აქვს ჩვენ ქვეყანას ეს პოტენციალი ?
– როგორც ზამთრის, ასევე ზაფხულის, ტურისტული კურორტების განვითარება, უმნიშვნელოვანესია ჩვენი ქვეყნის ეკონომიკისთვის. როგორც ვხედავთ, ტურიზმი ეკონომიკის ერთ–ერთ წამყვან სექტორად იქცა და ტურისტების რაოდენობაც ყოველწლიურად იზრდება. 2018 წლის 11 თვეში ტურიზმიდან ქვეყნის ეკონომიკაში 2 მილიარდ 750 მილიონი დოლარი შემოვიდა, რაც ნამდვილად შთამბეჭდავი ციფრია და იგი უთანაბრდება მთლიანი ექსპორტისა და რეექსპორტის საერთო მაჩვენებელს. შესაბამისად, ამ მაჩვენებლის გასაუმჯობესებლად და ტურისტების უფრო მეტად მოსაზიდად საჭიროა, როგორც ზამთრის, ასევე ზაფხულის კურორტებზე ინფრასტრუქტურის გაუმჯობესება და მათი განვითარება ყოველწლიურად. ფაქტია, რომ საქართველოს აქვს იმის პოტენციალი, რომ ღირსეული ადგილი დაიკავოს ტურისტულ რუკაზე. ამის საშუალებას გვაძლევს ჩვენი გეოგრაფიული მდებარეობა და ის, რომ შეგვიძლია წლის ყველა სეზონზე შესაბამისი კურორტები შევთავაზოთ ტურისტებს. ამიტომაც, ხელისუფლებამ კიდევ უფრო აქტიურად უნდა იზრუნოს როგორც უკვე არსებულ საკურორტო ქალაქებზე, ასევე ხელი შეუწყოს სხვა ქალაქების განვითარებასაც. ჩვენი ქვეყნის ფაქტორბრივად ყველა რეგიონი საინტერესოა ტურისტებისთვის, რისი დადასტურებაც ის 8 მილიონი ტურისტია, რომელიც 2018 წლის 11 თვეში ეწვია საქართველოს.
– როგორ შეაფასებთ ზამთრის კურორტებზე არსებული სერვისებისა და მომსახურების ხარისხს და ტურიზმის სფეროში ამის როლს ?
სერვისი და მომსახურების ხარისხი დღემდე ქართული ტურიზმის ,,აქილევსის ქუსლია“. სამწუხაროდ ჩვენ ვერ ვთავაზობთ ისეთ სერვისს ტურისტებს, როგორსაც ევროპის განვითარებული ქალაქები, ან თუნდაც თურქეთი. თუმცა, ისიც უნდა გავითვალისწინოთ, რომ ტურისტული ბუმი ბოლო წლების განმავლობაში გვაქვს საქართველოში, შესაბამისად ამ მიმართულებით ცოდნა და გამოცდილებაც გვაკლია. მე იმედს ვიტოვებ, რომ უახლოეს პერიოდში მომსახურების ხარისხი კიდევ უფრო გაუმჯობესდება ჩვენს საკურორტო ქალაქებში და საქართველოდან არცერთი ტურისტი აღარ წავა უკმაყოფილო.
კონკრეტულად ზამთრის კურორტებს რაც შეეხება, ვფიქრობ, საკმაოდ კარგი სათხილამურო ტრასები გვაქვს ჩვენს კურორტებზე და იქ არსებული სერვისიც საკმაოდ ნორმალურია. რაც ყველაზე მნიშვნელოვანია, არსებული ინფრასტრუქტურა ყოველწლიურად ვითარდება, რაც იმის იმედს მაძლევს, რომ სულ მალე ერთ–ერთი წამყვანი დონის ზამთრის საკურორტო ქალაქები გვექნება.
– როგორც ცნობილია, ძვირდება ფასები სეზონის მოსვლასთან ერთად. რას უკავშირებთ ამ გაძვირებას და კიდევ სხვა სერვისებზე ხომარაა მოსალოდნელი ფასების მატება ?
ბუნებრივია, ფასების ზრდა არ არის კარგი ფაქტი და კარგი იქნებოდა მსგავს ფაქტებს რომ არ ჰქონდეს ხოლმე ადგილი. თუმცა, ალბათ ამ კონკრეტულ შემთხვევაში არსებობს გარკვეული დასაბუთება თუ რამ გამოიწვია საბაგიროზე ფასების ზრდა, სამწუხაროდ მე ასე დეტალურად არ ვარ ჩახედული საკითხში და არც იმის შესახებ მსმენია, რომ სხვა სერვისებზეც იგეგმებოდეს ფასების ზრდა.
-თქვენი აზრით, როგორი სეზონი გველის ამ ზამთარში და რა ეკონომიკურ მოგებას მოუტანს ქვეყანას წელს ჩვენი ზამთრის კურორტები ?
კონკრეტულ ციფრებზე საუბარი რთულია, თუმცა იმედის ვიტოვებ, რომ წელს საკმაოდ კარგი ზამთრის ტურისტული სეზონი გვექნება. უფრო მეტი ტურისტი ეწვევა ჩვენს ქვეყანას, ვიდრე ეს წინა წლებში იყო და ასევე, მნიშვნელოვანია შიდა ტურიზმის განვითარებაც. როგორც აღვნიშნე, ტურიზმი ქართული ეკონომიკის ლოკომოტივად იქცა და იგი ხელს უწყობს ერთის მხრივ ეკონომიკაში თანხების შემოდინებას და მეორეს მხრივ თავად საკურორტო ქალაქების განვითარებას, ადგილობრივი მაცხოვრებლების დასაქმებასა და შემოსავლების ზრდას.
ანა ურუშაძე
