რუსეთის მიერ ჩრდილოეთის ყინულოვან ოკეანეში, 30 გარემოსდამცველის დაკავების გასაპროტესტებლად მსოფლიოს მაშტაბით აქციები იმართება. მოსკოვში გამოსვლის ადგილი გორკის პარკი გახლდათ.
აქციაში მონაწილეებმა დაკავებულების გათავისუფლება მოითხოვეს და ზოგიერთი მათგანის მიმართ წამოყენებულ ბრალდებას ”მეკობრეობას” სისულელე უწოდეს.
მათივე თქმით, ჩრდილოეთის ყინულოვან ოკეანეში აქციები მშვიდობიანი იყო და აქ ნავთობის მოპოვების დაწყების შემთხვევაში ეკოლოგიური კატასტროფა და ბიოლოგიური ბალანსის დარღვევა მოხდება.
ჰონგ კონგში კი 145-მა დემონსტრანტმა მშვიდობიანი აქციის მომწყობი გარემოს დამცველების დაკავება დაგმო და მათ მოსკოვს დაკავებული 30 გარემოსდამცველის სასწრაფოდ გათავისუფლება მოსთხოვეს.
მსგავსი აქციები მსოფლიოს 80 ქალაქში გაიმართა.
ამნისტიის საერთაშორისო ორგანიზაციამ რუსეთის მიერ აქტივისტების დაკავება აზრის გამოხატვის თავისუფლების შეზღუდავდ შეაფასა.
მსოფლიოს სხვადასხვა ქვეყნებში მდებარე რუსეთის საელჩოებს წერილებს უგზავნიან დაკავებულების გათავისუფლების მოთხოვნით. გავრცელებული ინფორმაციის თანახმად, ამ წერილთა რაოდენობამ უკვე 800 ათას გადააჭარბა.
07.10.13
