ევროპასთან ინტეგრაციის კომიტეტის თავმჯდომარემ, თამარ ხულორდავამ და თავმჯდომარის პირველმა მოადგილემ, ირინა ფრუიძემ, ევროკავშირის საბჭოს თავმჯდომარე ქვეყნის – რუმინეთის სპეციალური მოწვევით, ევროკავშირის ეროვნული პარლამენტების ევროპულ საქმეთა კომიტეტების (COSAC ) თავმჯდომარეთა შეხვედრაში მიიღო მონაწილეობა.
ევროპის პარლამენტების წარმომადგნელებმა, რუმინეთის სენატში, რუმინეთის ხელისუფლებისგან მომდევნო 6 თვის განმავლობაში ევროკავშირის საბჭოს პრიორიტეტები მოისმინეს, რაც ევროპის გაერთიანებისა და უსაფრთხოების განმტკიცებისკენ იქნება მიმართული.
თამარ ხულორდავამ სხდომაზე საქართველოს ევროკავშირთან დაახლოების პროცესზე და ევროკავშირის 2020-2027 წლის ბიუჯეტში საქართველოსა და სხვა ასოცირებული ქვეყნებისთვის დამატებითი ფინანსური რესურსის გათვალისწინების აუცილებლობაზე ისაუბრა. ევროკავშირის მრავალწლიანი ბიუჯეტის შეთანხმება სწორედ, რუმინეთის თავმჯდომარეობის პერიოდში იგეგმება.
2019 წლის პირველ ნახევარში, ევროკავშირის საბჭოს თავმჯდომარეობისას, საქართველოს პარლამენტსა და რუმინეთის პარლამენტს შორის არსებული კონსტრუქციული სამუშაო ურთიერთობები კიდევ უფრო გააქტიურდება.
ვიზიტის ფარგლებში, თამარ ხულორდავამ ევროკავშირის წევრი ქვეყნების ეროვნული პარლამენტის წარმომადგნელებთან ორმხრივი შეხვედრები გამართა.
„ევროკავშირის წევრი ქვეყნების ევროპულ საქმეთა კომიტეტების ბიუროს სხდომაზე საქართველოს ევროპულ ინტეგრაციაზე და ევროკავშირის ახალ მრავალწლიან ბიუჯეტში საქართველოსთვის ხელმისაწვდომ ფინანსურ მხარდაჭერაზე ვისაუბრეთ.
რუმინეთის, როგორც ევროკავშირის საბჭოს თავმჯდომარე ქვეყნის პრიორიტეტი, აღმოსავლეთ პარტნიორობის კერძოდ, შავი ზღვის აუზის ქვეყნების ევროკავშირთან ინტეგრაციის მხარდაჭერაა” – განაცხადა თამარ ხულორდავამ.
