აზერბაიჯანის საპრეზიდენტო არჩევნებში ხმათა 84,73%-ით ილჰამ ალიევი ლიდერობს. BBC-ის ინფორმაციით, აზერბაიჯანის ცენტრალურმა საარჩევნო კომისიამ ბიულეტენების 72% უკვე დაითვალა.
კომისიის თავმჯდომარე მაზაჰირ პანახოვის განცხადებით, არსებული შედეგებით უკვე შესაძლებელია ითქვას, რომ მოქმედი პრეზიდენტი მესამე ვადით აირჩიეს.
ილჰამ ალიევმა სატელევიზიო მიმართვაში აზერბაიჯანის მოსახლეობას მხარდაჭერისთვის მადლობა გადაუხადა.
მოქმედი პრეზიდენტის ძირითადმა ოპონენტმა ჯამილ ჰასანლიმ, რომელიც არჩევნებში ოპოზიციური კოალიციის სახელით მონაწილეობდა, ამ დროისთვის მხოლოდ 8,2%-ის მხარდაჭერა მიიღო.
მმართველი პარტია “ახალი აზერბაიჯანის” დამკვირვებლები აცხადებენ, რომ ოპოზიციის საუბარი არჩევნებზე მასობრივი დარღვევების შესახებ, გამოგონილია. ჩეხეთის პარლამენტის დამკვირვებლები კი აზერბაიჯანის საპრეზიდენტო არჩევნებს მშვიდობიანს უწოდებენ, რომელმაც წყნარ ვითარებაში ჩაიარა.
10.10.13
