ადამიანის უფლებათა დაცვისა და სამოქალაქო ინტეგრაციის კომიტეტმა, რეგიონების შემდეგ, თბილისში, ნაძალადევის მაჟორიტარული ოლქის მოსახლეობასთან გამართა შეხვედრა და კომიტეტის მიერ, გასულ წელს განხორციელებული რეფორმების შესახებ ესაუბრა. შეხვედრაზე ისაუბრეს ქვეყანაში არსებულ გამოწვევებზე და მათ საპასუხო საკანონმდებლო ცვლილებებზე. განსაკუთრებით აღინიშნა სოციალური მუშაობის შესახებ კანონის როლი საზოგადოების ყველაზე მოწყვლადი ჯგუფების უფლებების დასაცავად.
„ყოველ დღე ვრწმუნდები ჩვენი გადაწყვეტილების სისწორეში, გადაუდებლად მიგვეღო ზომები სოციალური მუშაკის ინსტიტუციური რეფორმის გასატარებლად. ახლა, როდესაც კანონი და საიმპლემენტაციო გეგმა უკვე შექმნილია, ძალისხმევა უნდა მივმართოთ მისი ჯეროვანი ამოქმედებისკენ. დარწმუნებული ვარ, საზოგადოება თანდათან დაინახავს სახელმწიფოს პროაქტიულ როლს რისკების თავიდან აცილებაში“,- აღნიშნა სოფო კილაძემ შეხვედრის შესახებ კომენტირებისას.
მეორე მნიშვნელოვანი საკითხი, რომელზეც შეხვედრაზე იყო საუბარი, ეხებოდა ოჯახში ძალადობის პრევენციისკენ მიმართულ საკანონმდებლო პაკეტს, რომელიც ასევე, კომიტეტის მიერაა ინიცირებული.
შეხვედრა ეროვნულ დემოკრატიული ინსტიტუტის (NDI) მხარდაჭერითა და ბრიტანეთის მთავრობის UK Aიდ-ის ფინანსური ხელშეწყობით გაიმართა.
