საქართველოს განათლების, მეცნიერების, კულტურისა და სპორტის მინისტრმა მიხეილ ბატიაშვილმა, განათლების, მეცნიერებისა და კულტურის კომიტეტის სხდომაზე, ხაზი გაუსვა, რომ სამინისტრო მთელი ქვეყნის მასშტაბით მუდმივად ახორციელებს როგორც გეგმიურ, ისე არაგეგმიურ შემოწმებებს.
„სიტუაციის შესწავლისა და პრობლემათა გამოსწორების მიზნით სამინისტრო მთელი ქვეყნის მასშტაბით მუდმივად ახორციელებს როგორც გეგმიურ, ისე არაგეგმიურ შემოწმებებს. რაც შეეხება უშუალოდ სკოლებს, მხოლოდ 2018 წელს შემოწმებათა შედეგად დაიწერა 101 დასკვნა, მითითება და გაფრთხილება მიეცა 54 სკოლას, გათავისუფლდა 8 სკოლის დირექტორი, 2 – რესურსცენტრის ხელმძღვანელი, ხოლო სამართალდამცავ ორგანოში გადაიგზავნა 22 კანონდარღვევის საქმე!
აღსანიშნავია, რომ სკოლების შემოწმების ორი საფუძველი არსებობს: ერთია გეგმიური შემოწმება, რომელსაც სამინისტრო თავისი რესურსებისა და ფიზიკური შესაძლებლობის შესაბამისად, თანმიმდევრულად და მუდმივად ახორციელებს. მაგრამ რადგან ამ რესურსებს არ შეუძლია გაწვდეს ათასობით სკოლას ერთდროულად, ხშირია შემთხვევები, როდესაც სკოლის პრობლემების შესახებ ინფორმაციას მოქალაქეთა, მშობლებისა თუ პედაგოგებისაგან ვიღებთ. ასეთ შემთხვევაში სამინისტრო, გეგმიური გრაფიკის პარალელურად, დაუყვნებლივ ახდენს რეაგირებას. მრავალი ათეული ასეთი შემთხვევის გაცნობა გვიჩვენებს, რომ სკოლის შემოწმება, როგორც წესი, იწყება განცხადებით მომართვიდან მეორე სამუშაო დღესვე“ – განაცხადა მინისტრმა.
