2017 წლის 28 მარტიდა, მას შემდეგ რაც საქართველოსა და ევროკავშირს შორის უვიზო მიმოსვლა ამოქმედდა შენგენის ზონის ქვეყნებში შესვლაზე საქართველოს 242 მოქალაქეს უთხრეს უარი. ამის შესახებ ინფორმაციას 1tv ავრცელებს. ამ მონაცემებში ის პირები შედიან , რომლებმაც შენგენის ზონაში გასამგზავრებლად ისარგებლეს პირდაპირი რეისით.
ყველაზე მეტი უარი საქართველოს მოქალაქეებს იტალიამ უთხრა, ამ ქვეყანაში 62 ქართველი არ შეუშვეს. შემდეგ მოდიან საბერძნეთი და პოლონეთი 41-41 შემთხვევა. ასევე გერმანია და კვიპროსი 27-27 შემთხვევა 20 მოქალაქეს უარი ეთქვა უნგრეთში შესვლაზეც.
შსს-ს ინფორმაციით, ჯამში, შენგენის ზონის ქვეყნების მიმართულებით, გაემგზავრა საქართველოს 83 359 მოქალაქე. მონაცემები დათვლილია მიმდინარე წლის 28 მარტიდან 7 სექტემბრის ჩათვლით.
ევროკავშირთან უვიზო მომოსვლა 28 მარტს შევიდა ძალაში. საქართველოს მოქალაქეები ევროკავშირის 22 წევრ, 4 არაწევრ და შენგენის 4 კანდიდატ ქვეყანაში უვიზოდ მიმოსვლას 90 დღის განმავლობაში შეძლებენ.
ევროპასთან უვიზო მიმოსვლას ხელი 1 მარტს მოეწერა. 8 მარტს გადაწყვეტილება ევროკავშირის ოფიციალურ ჟურნალში გამოქვეყნდა. საბოლოო ცვლილება რეგულაციაში, რომელიც საქართველოს მოქალაქეებისთვის ევროკავშირის/შენგენის წევრ ქვეყნებში უვიზო მიმოსვლის შემოღებას ითვალისწინებს, ევროკავშირის საბჭომ 27 თებერვალს დაამტკიცა.
საქართველო 61-ე ქვეყანაა, რომლის მოქალაქეებს შენგენის ზონაში უვიზოდ მოგზაურობა შეეძლება. ამ უფლებით უკვე სარგებლობს ჩრდილოეთ, სამხრეთ და ცენტრალური ამერიკის ქვეყნების უმრავლესობა, ასევე, ავსტრალია, ახალი ზელანდია, ისრაელი, გაერთიანებული საემიროები, იაპონია, სამხრეთ კორეა, მოლდოვა, ბალკანეთის სახელმწიფოები (კოსოვოს გარდა) და რამდენიმე სხვა ქვეყანა.
Wikipedia-ზე საქართველო უკვე იმ სახელმწიფოებს შორისაა მითითებული, რომელთა მოქალაქეებს შენგენის ზონაში უვიზოდ მოხვედრა შეუძლიათ.