“სპილოუ” – ბრენდი, რომლის პირბადეებიც ბრიტანულმა გაზეთმა საუკეთესო ხუთეულში დაასახელა

უკვე ერთი წელი სრულდება, რას მსოფლიოში პანდემია მძვინვარებს. მისი გამოვლენის პირველი ეტაპები ყველა ქვეყანაში, მეტნაკლებად, განსხვავებული იყო. covid19-ით გამოწვეული პრობლემები ბიზნესს განსაკუთრებულად შეეხო. არაერთმა ბრენდმა თუ კომპანიამ შეიცვალა პროფილი და დაიწყო პირბადეების მზადება. ბევრმა მათგანმა ვერ გაუძლო კონკურენციას, ვერ შეძლო მაღალი ხარისხის ნიღბების დამზადება. თუმცა, ზოგიერთი გამორჩეულად ხარისხიანი აღმოჩნდა.

პირბადეების წარმოება “სპილოუ”-მაც დაიწყო. მისი ხარისხი კი არა მხოლოდ საქართველოსთვის გახდა ცნობილი, არამედ – მსოფლიოსთვის. ბრიტანულმა გამოცემამ – The Sun ბრენდის წარმოება მსოფლიოში 5 საუკეთესოში დაასახელა.

“სპილოუს” თანადამფუძნებელი, მარინკა ღარიბაშვილი “თბილისი თაიმსს” ესაუბრა.

როდის და რატომ დაიწყეთ პირბადეების წარმოება?

პანდემია რომ გამოცხადდა, მაღაზია დავხურეთ. ბევრმა გვირჩია, რომ პირბადეები გვეწარმოებინა, მაგრამ აზრები იყო განსხვავებული – რამდენად იცავს, რამდენად კარგია, რამდენად საჭიროა და ა.შ. იქედან გამომდინარე, რომ “სპილოუ” ცელქი ბავშვების ტანსაცმელია, ვფიქრობდით, რომ ბავშვებისთვის პირბადე არ იყო საჭირო. თუმცა, მალევე შევიცვალეთ აზრი იმიტომაც, რომ სავალდებულოც გახდა პირბადის ტარება. დავიწყეთ წარმოება ჩვენივე პროდუქციის ნარჩენი ნაჭრებისგან – ისინი საქართველოში ძალიან პოპულაური გახდა და მიზნად დავისახეთ, რომ საერთაშორისო ბაზარზეც გაგვეშვა.

რა იყო თქვენი წარმატების პირველი ნაბიჯი?

სწორედ ამ დროს გამოჩნდა ეკონომიკური პოლიტიკის კვლევის ცენტრის გრანტი და მივიღეთ დაფინანსება. იყო ასეთი პროექტი – “ქართული ბიზნესი ახლოს ევროპასთან”.   ეს გახლდათ შვედეთის საელჩოს დაფინანსება. გამოვიყენეთ იმაში, რომ ავიყვანეთ კომპანია დიდ ბრიტანეთში, რომელმაც ჩვენი პირბადეები განათავსა “ამაზონზე”.

რით გამოირჩევა თქვენი პირბადე?

ჩვენი პირბადე არის ოთხშრიანი, შეკერილია ნატურალური ქსოვილებისგან და შიგნით დართული აქვს დოლბანდის ფენები – ანუ ორი ფენა ბამბაა და ორი ფენა – დოლბანდი. გამორჩეული, ალბათ, მაინც დიზაინითაა და ფერებით – მხიარული ფერებია, შესაძლებელია ტანსაცმელთან შეხამება და ა.შ.

გამოცემამ The Sun თქვენი პროდუქცია საუკეთესო ხუთეულში დაასახელა. თქვენი ეს წარმატება რა მნიშვნელობის აღმოჩნდა?

გაზეთი The Sun არის ბრიტანეთში ერთერთი ყველაზე მაღალტირაჟიანი ყოველდღიური გამოცემა. მოვხვდით ხუთ საუკეთესო პირბადეს შორის. როგორც ჟურნალისტი წერს, ჩვენი პირბადე აირჩა მისი დიზაინის გამო, მიგვამსგავსა “ემილიო პუჩის” და აღნიშნავს, რომ დანარჩენ დიზაინერულ პირბადეებთან შედარებით ჩვენი პროდუქცია არის იაფია, თუმცა, ამავე დროს, ძალიან ლამაზი. ეს წარმატება ჩვენთვის ძალიან მნიშვნელოვანია. მსგავსი ფაქტები შემთხვევით არ ხდება, ადამიანები თანხებს იხდიან მსგავს გამოცემებში მოსახვედრად. ეს ფაქტი დაგვეხმარება ცნობადობის ამაღლებაში იქაურ ბაზარზე და დიდი იმედი გვაქვს, გაყიდვების გაზრდაშიც.

რა სამომავლო გეგმები აქვს ბრენდს?

დიდი იმედი გვაქვს, რომ პანდემია მალე დასრულდება და ეს ყველაფერი დროებითია. რადგან ჩვენი ბრენდი უკვე დარეგისტრირებულია “ამაზონზე”, აუცილებლად უნდა გავაგზავნოთ იქ ჩვენი ძირითადი პროდუქტები, რაც არის საბავშვო ტანსაცმელი. პირველ ყოვლისა, დავიწყეთ “დინოზავრი ჟაკეტების” წარმოება, რომლებსაც გავუშვებთ. ისინი არის ჩვენი ყველაზე პოპულარული პროდუქტი და ჩვენი სავიზიტო ბარათი. სამომავლოდ ძალიან დიდი  იმედი გვაქვს, რომ როგორც საქართველოშია პოპულაური, საერთაშორისო ბაზარზეც “სპილოუს” ძალიან ბევრი გაიცნობს.

მასალა მოამზადა : მარიამ ტიელიძემ