საქართველოს ფინანსთა სამინისტროს საგამოძიებო სამსახურის თანამშრომლებმა, სამსახურებრივი გულგრილობის ფაქტზე, ბრალდებულის სახით , ჭიათურის მუნიციპალიტეტის საკრებულოს თავმჯდომარე, იასონ ჭუმბურიძე პასუხისგებაში მისცეს.
საგამოძიებო სამსახურის ცნობით, გამოძიებით დადგენილია, რომ 2011 წელს ჭიათურის მუნიციპალიტეტსა და შპს ,,მანგს” შორის, ჭიათურაში მდებარე კლდის ქვათაცვენის სალიკვიდაციო სამუშაოების შესრულებასთან დაკავშირებით, სახელმწიფო შესყიდვის რამდენიმე ხელშეკრულება გაფორმდა.
უწყების ინფორმაციით, ჭიათურის მუნიციპალიტეტის საკრებულოს თავმჯდომარე, იასონ ჭუმბურიძემ გულგრილად და არაჯეროვნად შეასრულა მასზე დაკისრებული მოვალეობები, რაც გამოიხატა იმაში, რომ არ შეამოწმა შესრულებული სამუშაოების ნამდვილობა და ხარისხი, რითაც ხელი შეუწყო უჩა ღვინჯილიას მიერ დანაშაულებრივი ქმედების ჩადენას და 423 465 ლარის მიითვისებას.
გამოძიება საქართველოს სისხლის სამართლის კოდექსის 342-ე მუხლით გათვალისწინებული დანაშაულის ჩადენისთვის მიმდინარეობს.
01.01.14
