“ჩვენ გვექნება საუკეთესო ოლიმპიური სოფელი საქართველოში,” – განაცხადა ევროპის ოლიმპიური კომიტეტების საკოორდინაციო კომისიის თავმჯდომარემ ჯოზეფ ლიბამ “ევროპის ახალგაზრდული ოლიმპიური ფესტივალის, თბილისი 2015-ის” საორგანიზაციო კომისიის სხდომაზე.
სხდომა საქართველოს ეროვნულ ოლიმპიურ კომიტეტში გაიმართა და მას საქართველოს პრემიერ-მინისტრი ირაკლი ღარიბაშვილი ხელმძღვანელობდა.
მან კომისიის წევრებისგან საფესტივალო სამზადისის შესახებ ანგარიში მოისმინა.
საქართველოს მთავრობის მეთაურმა მადლობა გადაუხადა საკოორდინაციო კომისიის წარმომადგენლებს თბილისში ვიზიტისთვის და გაეცნო მათ შეფასებასა და რეკომენდაციებს მიმდინარე ინფრასტრუქტურული პროექტების შესახებ.
როგორც ჯოზეფ ლიბამ შეხვედრაზე განაცხადა, ეს მათი მეოთხე ვიზიტია საქართველოში და პროგრესი მზარდი და თვალსაჩინოა. მანვე მადლობა გადაუხადა ირაკლი ღარიბაშვილს ოლიმპიადის მზადების პროცესში აქტიური ჩართულობისა და საკოორდინაციო კომისიასთან სტაბილური თანამშრომლობისთვის.
“ახალგაზრდული ოლიმპიური ფესტივალი ძალიან მნიშვნელოვანი ღონისძიებაა ჩვენი ქვეყნისთვის, სადაც ასეთი მასშტაბური ღონისძიება ჯერ არ ჩატარებულა. მე პირადად აქტიურად ვარ ჩართული საორგანიზაციო საკითხებში და ვაკონტროლებ მიმდინარე სამზადისს. თბილისში იმყოფებიან ევროპის ოლიმპიური კომიტეტების საკოორდინაციო კომისიის დამკვირვებლები. მათ კმაყოფილება გამოთქვეს ოლიმპიადის სამზადისთან დაკავშირებით,” – განცხადა ირაკლი ღარიბაშვილმა სხდომის დასრულების შემდეგ.
16.04.14
