საქართველოს უახლესი ისტორია გაჯერებულია ფაქტებით და მოვლენებით რამაც დიდი ჭრილობა მიაყენა სრულიად ქართველობას. ყოველთვის, როდესაც ქვეყანა ჩიხში შედიოდა ადამიანები გამოსავალს ეძებდნენ, ირჩევდნენ ლიდერებს, რომლებიც მათ წინ მიუძღოდათ. დიდი რეიტინგით მოსული ლიდერები ასევე დიდი რეიტინგით მარცხდებოდნენ. ასე ხდებოდა თუ ისე „თბილისი თაიმსის“ კითხვაზე, თუ ვის მიიჩნევს ქართული საზოგადოება ყველაზე ეფექტურ მმართველად ძალზედ საინტერესო შედეგები მივიღეთ.
გამოკითხვა „თბილისი თაიმსის“ ვებ-გვერდზე 12 მარტიდან 30 აპრილის ჩათვლით მიმდინარეობდა და 603-მა მოქალაქემ მიიღო მონაწილეობა. ჩვენს კითხვარში წარმოდგენილნი იყვნენ დამოუკიდებელი საქართველოს უახლესი ისტორიის სახელმწიფო მეთაურები, ზვიად გამსახურდია, ედუარდ შევარდნაძე, მიხეილ სააკაშვილი და მისი მმართველობის პერიოდში მთავრობის მეთაურები. 2012 წლის 1 ოქტომბრის არჩევნების შემდგომ, როგორც საზოგადოებას მოეხსენება პრეზიდენტის ფუნქციები შემცირდა და სახელმწიფოს მართვის სადავეები პრეზიდენტისგან პრემიერზე გადავიდა და პრეზიდენტი ქვეყნის სიმბოლურ მმართველად იქცა, თუმცა რასაკვირველია ჩვენს კითხვარში მითითებული იყო ამჟამინდელი პრეზიდენტი, გიორგი მარგველაშვილი და პრემიერ-მინისტრი ირაკლი ღარიბაშვილი.
შედეგები კი ასე გადანაწილდა:
- პრეზიდენტი მიხეილ სააკაშვილი (39%, 232 ხმა)
- პრეზიდენტი ზვიად გამსახურდია (18%, 109 ხმა)
- პრემიერი ირაკლი ღარიბაშვილი (14%, 82 ხმა)
- პრემიერი ბიძინა ივანიშვილი (9%, 56 ხმა)
- პრემიერი ზურაბ ჟვანია (9%, 55 ხმა)
- პრეზიდენტი ედუარდ შევარდნაძე (5%, 31 ხმა)
- პრემიერი ივანე მერაბიშვილი (4%, 22 ხმა)
- პრეზიდენტი გიორგი მარგველაშვილი (1%, 5 ხმა)
- პრემიერი ლადო გურგენიძე (1%, 5 ხმა)
- პრემიერი ნიკა გილაური (0%, 3 ხმა)
- პრემიერი ზურაბ ნოღაიდელი (0%, 3 ხმა)
როგორც შედეგებიდან ჩანს, გამოკითხვის სათავეში მიხეილ სააკაშვილი მოექცა, რომელიც საქართველოს სახელმწიფო მეთაური 2004-2013 წლებში გახლდათ, მას დიდი სხვაობით ჩამორჩება პრემიერი ირაკლი ღარიბაშვილი და პრეზიდენტი გიორგი მარგველაშვილი, კიდევ უფრო გასაკვირი კი ის ფაქტია, რომ პრეზიდენტი სააკაშვილი კოალიცია „ქართულ ოცნებასთან“ დამარცხდა, რომლის ხელმძღვანელიც ყოფილი პრემიერი ბიძინა ივანიშვილი გახლდათ. თუმცა, როგორც გამოკითხვის შედეგებმა აჩვენა ეფექტური მმართველი მაინც მიხეილ სააკაშვილი აღმოჩნდა.
გიორგი ჩუბინიძე
01.05.14
