საქართველოს ეკლესია-მონასტრების მიერ მოხმარებული გაზის საფასურს “სოკარ ენერგო-ჯორჯია” აანაზღაურებს, – ამასთან დაკავშირებით დღეს საპატრიარქოში კომპანია “სოკარ ენერგო ჯორჯიას” გენერალურ დირექტორს მაირ მამედოვსა და პატრიარქის ქორეპისკოპოს, მეუფე იაკობს შორის ხელშეკრულება გაფორმდა.
როგორც ხელშეკრულებაზე ხელმომწერებმა აღნიშნეს, რომ 2013 წლის 19 ოქტომბერს კომპანიასა და საპატრიარქოს შორის გაფორმდა მემორანდუმი, რომლის თანახმადაც, “სოკარ ენერგო-ჯორჯია” 2013 წლის 1 ნოემბრიდან 2014 წლის 1 ნოემბრის ჩათვლით საქართველოს ტერიტორიაზე არსებულ მართლმადიდებლურ ეკლესია-მონასტრებს, ასევე სხვა რელიგიური კონფესიების დაწესებულებებს ბუნებრივი აირის მიწოდებით უზრუნველყოფს.
მეუფე იაკობმა მადლობა გამოთქვა კეთილმეზობელი აზერბაიჯანელების მიმართ, რომლებმაც უფასოდ ბუნებრივი აირის მიწოდებით ქვეყანას დიდი დახმარება გაუწიეს.
“საქართველოს ეკლესია-მონასტრებს და სხვა კონფეციებს უფასოდ მიეწოდება გაზი და ალბათ, ეს არ არის ერთწლიანი ხელშეკრულება. ჩვენ დიდ ყურადღებას ვრძნობთ აზერბაიჯანული მხარის მხრიდან. მართლაც, კეთილმეზობლური ურთიერთობა გვაქვს და ეს კეთილმეზობლობა ჩვენი ხალხების ურთიერთობაში და ჩვენი ქვეყნის ინტერესებში სრულად იქნება ასახული”, – აღნიშნა მეუფე იაკობმა.
თავის მხრივ, კომპანია “სოკარ ენერგო-ჯორჯიას” გენერალურმა დირექტორმა მაირ მამედოვმა კმაყოფილება გამოთქვა, რომ მის კომპანიას საშუალება აქვს საქართველოში მეტად მნიშვნელოვანი საქმე აკეთოს.
მისივე თქმით, მათთვის ორმაგად საამაყოა, რომ კომპანიას შეუძლია სარგებლობის მოტანა ისეთ ფაქიზ, მნიშვნელოვან საქმეში, როგორიც არის ქვეყნის სულიერება, რელიგია. მისივე თქმით, საქართველო მართლმადიდებელი ქვეყანაა და ისევე, როგორც აზერბაიჯანში სხვა რელიგიის წარმომადგენლებს პატივს სცემენ და მათ მიმართ ტოლერანტები არიან.
მისივე თქმით, ასევე გაფორმდება ხელშეკრულება სხვა კონფესიების წარმომადგენლებთან. აღნიშნული ხელშეკრულების საფუძველზე “სოკარ ენერგო ჯორჯია” 375 ეკლესია-მონასტრის მიერ მოხმარებულ ბუნებრივი აირის საფასურს ერთი წლის განმავლობაში აანაზღაურებს.
02.05.14
