P.S.
ჯერ კიდევ წინა დარტყმისაგან გაბრუებულს და დარეტიანებულს ახალი, კიდევ უფრო მძიმე დარტყმა მომაყენეს, თანაც წელს ქვემოთ წესების დაცვის გარეშე და სამწუხაროდ, კვლავ ნოკდაუნში აღმოვჩნდი.
ანტიდისკრიმინაციული კანონის მიღების შემდეგ ორი თვეც არ იყო გასული, რომ სრულიად მოულოდნელად საყოველთაო გარყვნილებისა და ორგიების უბადლო მენეჯერ–მომწყობ ორგანიზატორად და მამად აღიარებული ნიკიტა მარშუნოკის მეთაურობით უზნეო ჰეტეროსექსუალთა ფრთა გაააქტიურეს.
ამჯერად აღვირახსნილთა სულ სხვა ყაიდის მუმლი შემომესია, მაგრამ ისინიც ჩემს გაქრობას ლამობენ. მესმის როგორ ხარხარებს სასურველი შედეგის მოლოდინით აღტკინებული უზნეობა, ხელებს იფშვნეტს სიამოვნებისაგან, გონებაში კი მისთვის სასურველ, მზაკვრულ გეგმებს აწყობს. მისი ფიქრებია: –რაც შეიძლება მეტი ადამიანი უნდა ჩამოვიყვანოთ ანაკლიაში, შემოვიტყუოთ ჩემს სიამეთა სამფლობელოში, სიძვისა და ბახუსის მარწუხებში მოვამწყვდიოთ, თრობის მორევში ღრმად, ძალიან ღრმად უნდა ჩავითრიოთ, ისე, რომ იქ დაიდონ ბინა სამუდამოდ. განსაკუთრებით ეს მერყევ, მოორჭოფე ახალგაზრდებს ეხება, მათ – ვისაც ჯერ ვერ გადაუწყვეტიათ საით? აქეთ – ჩემსკენ, უზნეობისაკენ, თუ იქით – ზნეობისაკენ. ადამიანების მოსაზიდად დიდი სამუშაოა ჩასატარებელი. უზადოდ უნდა გაპიარდეს ,,კაზანტიპის” ანუ ჩემი ფესტივალის ყველა ღონისძიება. და რაც მთავარია, ძალზე მნიშვნელოვანია სპეციალური პიარ–აქციების ჩატარება თინეიჯერებისათვის, რადგანაც ეს ის ნედლი მასალაა, რომლისგანაც ნებისმიერი ტიპის ადამიანის გამოძერწვა შეიძლება. სწორედ ამიტომ მათი რაოდენობა არ უნდა შეიზღუდოს. პირიქით, შევთავაზოთ სიამენი ამა ქვეყნისანი უხვად, დიდი დოზებით, რათა უზნეობაზე დამოკიდებულთა რიცხვი კიდევ უფრო გაიზარდოს. დღეს
აქ – ლოკალურად, ხვალ იქ, ზეგ კიდევ უფრო შორს და უფრო მეტი, და მოედებიან უკვე მოდებულნი ჩვენს პლანეტას უთვალავებად. მაგრამ მიზნების მისაღწევად, სამომავლოდ ფართომასშტაბიანი პროექტების ხორცშესასხმელად ჩვენ გვჭირდება ფინანსები, ზღვა, ოკეანე ფინანსებისა, რათა კაზანტიპური ფესტივალების ქსელმა გადაფაროს მსოფლიო რუკის თითქმის მთელი ტერიტორია. რაც შეეხება ე.წ. ზნეობრივებს, მინდა მათ გასაგებად ვთქვა, რომ რომანტიკული საუკუნეები ისტორიას ჩაბარდა, წარსულშივე ჩარჩა ბევრი არაფრისმთქმელი ტრადიცია და წეს-ჩვეულება. ვფიქრობ, რაც გადარჩა ისინიც უნდა დავიწყებას მიეცეს და განადგურდეს, რადგანაც ახალ XXI – გლობალიზეციისა და ინტეგრაციის საუკუნეში, საყოველთაო დემოკრატიზაციის, კომპიუტერიზაციისა და მაღალი ტექნოლოგიების განვითარების ფონზე, მათი დრო და ადგილი აღარ დარჩება. დარწმუნებული ვარ, რომ ქვეყნებისა და ერების შერევა-ათქვეფის პროცესში ზნეობასა და უზნეობას შორის არსებული საზღვრები დაიკარგება, გაქრება და შეერევიან რა ერთმანეთს, მათი გარჩევა შეუძლებელი გახდება. შვებით ამოვისუნთქავ, რადგანაც ზნეობა-ღირსების ზეწოლისაგან საბოლოოდ განვთავისუფლდები და ვეღარავინ წამომაძახებს, რომ კოლექტიურმა ორგიებმა შეიძლება დაავადებათა აფეთქებები და ეპიდემიები გამოიწვიოს. მაგრამ თუ თავზეხელაღებულები მაინც გაბედავენ კაზანტიპის ჩატარების საწინააღმდეგო აქციების მოწყობას, პრობლემები არ შეგვექმნება, რადგანაც ანტიდისკრიმინაციული კანონი (L.G.B.T.) უმცირესობის მსგავსად, უზნეო ჰეტეროსექსუალთა უფლებებსაც დაიცავს. უზნეობა და მისი ლაშქარი უკან არ დაიხევს, ყველა საშუალებას გამოვიყენებთ, რათა ერთხელ და სამუდამოდ დავამარცხოთ, ძირს დავცეთ და უკვე ნოკაუტში ჩავაგდოთ ზნეობა ღირსებასთან ერთად.
აი, როგორი აზრები იხარშება უზნეობის უზნეო გონებაში. მას მსოფლიოზე გაბატონება განუზრახავს და ადამ და ევადან მოყოლებულ ბრძოლას – უზნეობასა და ზნეობას შორის – მისთვის სასურველი დასასრულით – Happy End-ით უნდა დაუსვას წერტილი. ადრე იგი შენიღბულად მოქმედებდა, დღეს კი ნიღაბი ჩამოიხსნა და ღიად დაიწყო ბრძოლა. სხვადასხვა უზნეო ხერხების, ორგანიზაციების, ე.წ. ფესტივალ-რესპუბლიკების გამოყენებით, მან თითქმის ყველგან გაიდგა ფესვი. მაგრამ ამჯერად ღონემიხდილი, გზაჯვარედინზე მდგარი, ღვთისმშობლის წილხვედრი პატარა ქვეყანა – საქართველო ამოიღო მიზანში.
და დაიწყო უზნეობამ მოქმედება. თავდაპირველად კაზანტიპის ფესტივალის ანაკლიაში ჩატარების იდეა უზნეობის სამყაროს რომელიღაცა ბოროტი ,,გენიოსის” თავში დაიბადა, შემდეგ ეს გენიალური აზრი საქართველოში ,,შემოაგდეს” და აიტაცეს თუ აატაცებინეს, და ერთ მშვენიერ დღეს ხალხს გამოუცხადეს, რომ ღვთისმშობლის წილხვედრ მიწაზე მაინცდამაინც ღვთისმშობლის მარხვაში გაურკვეველი სახის, თუმცა მინიშნებით, – კოლექტიური უზნეობის ფესტივალი ჩატარდებოდა. ახალი ამბავი, საღად მოაზროვნე საზოგადოებისათვის, თავზარდამცემი აღმოჩნდა, რადგანაც ღვთისმშობლის მიმართ ამგვარი უპატივცემულობა ყოველგვარ ზღვარს სცილდება. ქართველთა უმრავლესობას ღირსება შეულახეს, დაამცირეს. ეროვნული გენოფონდი კი საფრთხეშია, რადგანაც ახალგაზრდებს შორსწაუსვლელად, სამშობლოშივე სთავაზობენ გარყვნილების კურსების ჩატარებას. შესაძლოა, ფესტივალის ორგანიზატორები მათ მიერ ჩადენილი ცოდვის სიმძიმეს ვერც კი აცნობიერებენ, თუმცაღა უფრო სარწმუნოა მოსაზრება, რომ ისინი შეგნებულად აყენებენ შეურაცხყოფას ყველა ქართველისათვის წმიდათაწმიდას. მართლაც რომ – წარმოუდგენელი მკრეხელობაა. ასაე თუ ისე, ორივე შემთხვევაში ჩვენ საქმე გვაქვს ძალადობის კლასიკურ ნიმუშთან, ოღონდაც შებრუნებით – როდესაც უმცირესობა ძალადობას უმრავლესობაზე ახორციელებს. სულმოკლე უმცირესობის გარდა საქართველოში მცხოვრებ მოქალაქეთა უმრავლესობა ზნეობას უჭერს მხარს და მათთვის კაზანტიპის ფესტივალის მსგავსი ღონისძიებების ჩატარება – დაფუძნება -დაკანონება სრულიად მიუღებელია. იგივე მოსაზრებას იზიარებს საპატრიარქოც:,,… მაგრამ ყველამ უნდა იცოდეს, რომ ამ ფესტივალში ნებისმიერი სახით მონაწილეობა და მისი მხარდაჭერა უმძიმესი შედეგების მომტანი იქნება ქვეყნისთვისაც და ცალკეული პიროვნებებისთვისაც. ეკლესია, სულიერ შვილებზე ზრუნვიდან გამომდინარე, ვალდებულია, ამის შესახებ გააფრთხილოს საქართველოს მოსახლეობა”.
მაგრამ კაზანტიპის ფესტივალის მესვეურნი არაფრად აგდებენ ერისა და ბერის გულისთქმას, ისინი ურცხვად აგრძელებენ ფესტივალისათვის მზადებას.
ამიტომაც მათ მიმართ მიჩნდება კითხვები, უამრავი რატომ?
- რატომ აირჩიეს მაინცდამაინც საქართველო ფესტივალის ჩასატარებლად?
- რატომ ტარდება მაინცდამაინც ღვთისმშობლის მიძინების მარხვის უმძიმეს დღეებში?
- რატომ ასე ხანგრძლივი დროით – 10 დღის განმავლობაში?
- რატომ ჩქმალავთ, არ იძლევით სრულ ინფორმაციას კაზანტიპის ფესტივალის ჭეშმარიტი არსისა და მიზნების შესახებ?
- რატომ ატარებთ ფესტივალს ხალხის აზრის გათვალისწინების გარეშე?
- რატომ არ ითვალისწინებთ საპატრიარქოს რჩევებს?
- რატომ არ ხმოვანდება ინფორმაცია იმის შესახებ, რომ კაზანტიპის ფესტივალების შემდეგ უკრაინაში საგრძნობლად გაიზარდა შიდს-ით დაავადებულთა რაოდენობა?
- რატომ აქვთ პრივილეგიები ქალებს?
- რატომ ვერ აფიქსირებს ხელისუფლება ნათლად საკუთარ დამოკიდებულებას კაზანტიპის ფესტივალის მიმართ?
- 28 აგვისტოს მთელი ქრისტიანული სამყარო ღვთისმშობლის მიძინების დღესასწაულს აღნიშნავს. ლოგიკურად იბადება კითხვა: – სად უნდა იყვნენ ამ დღეს კაზანტიპის რესპუბლიკის მოქალაქეები -კაზანტიპის პლიაჟებზე განცხრომა- სიამოვნების მისაღებად თუ ეკლესიაში, თუ აქაც და იქაც. როგორ უნდა შევიდნენ სიამოვნებისაგან გაბრუებულნი ტაძარში, როგორ უნდა ემთხვიონ ღვთისმშობლის ხატს, შესთხოვონ პატიება?
- რატომ და როგორ არ აწუხებთ სინდისი ფესტივალის ორგანიზატორებს იმის გამო, რომ მათი სამშობლო ომის მდგომარეობაშია, რომ მათ უკრაინაში სისხლი იღვრება, ისინი კი სხვა ქვეყნის ტერიტორიაზე უზნეობის აღლუმებს ატარებენ?
- რატომ არ შეიძლება, რომ უკრაინელი ლამაზმანები ნაცვლად მრუშობისა, საქართველოში მოსალოცად ჩამოვიდნენ. მოილოცონ ტაძრები და ეკლესიები, რადგანაც ომიანობის ჟამს სამშობლოსათვის გაათმაგებული ლოცვაა საჭირო. ლოცვით ხომ საკუთარ თავსაც შეეწევიან და დედა უკრაინასაც.
ახლა კი, უმორჩილესად გთხოვთ, რამდენიმე რჩევა მიიღოთ ზნეობისაგან.
განსხვავებით უზნეობისგან, მე ადამიანის დაღუპვა როდი მინდა. პირიქით, ჩემი დიდი სურვილია, რომ ყველა – უცოდველიც და ცოდვილიც გადარჩეს.
მინდა გულწრფელად გითხრათ, რომ მე მათიც მესმის, ვისაც კაზანტიპის ფესტივალზე სურს მოხვედრა. ისინი ახალგაზრდები არიან, მათ ძარღვებში სისხლი საოცარი სისწრაფით ჩქეფს, გრძნობები სწორ გადაწყვეტილებებს უსწრებს, სიამოვნების მიღება და გართობა სურთ, მაგრამ სამწუხაროდ კოლექტიურ გართობა-სიამოვნებაში ხშირად საწამლავი, შხამია გარეული. განუკურნებელი დაავადებები – შიდსი, C ჰეპატიტი, სხვადასხვა ვენერიული დაავადება, ბოლოჟამს გამძვინვარებული ებოლა ვერაგულად ჩასაფრებულან კოლექტიური გარყვნილების კუთხე-კუნჭულებში და თავიანთ მსხვერპლს მოთმინებით ელიან. საყოველთაო განცხრომა-გართობის სიღრმეში ნაღმია დაფლული, რომელიც ადრე თუ გვიან აუცილებლად აფეთქდება და კოლექტიური ცოდვების გამო ერი ინდივიდუალური და კოლექტიური სასჯელებით დაისჯება. სოდომის და გომორის ბიბლიური ისტორიით თავს აღარ შეგაწყენ, ჩემო მკითხველო. რომაელები, რომლებიც ყოველწლიურად აწყობდნენ ვულკანალიის და სატურნალიის თამაშებს, რომელთაც იმგვარივე ფუნქცია გააჩნდათ, როგორიც თანამედროვეობაში ელექტრონული მუსიკის ფესტივალებმა იტვირთეს, ისევე დაისაჯნენ საკუთარი ცოდვებისთვის გამძვინვარებული ვეზუვის ამოფრქვევით, როგორც ზემოხსენებული სოდომ-გომორი. იმისათვის, რომ სახელმწიფომ ერთ მუჭად შეკრას საკუთარი ქვეყნის მოსახლეობა, მტკიცე ხელთან და მათრახთან ერთად, მიზერული ძღვენიც არის საჭირო. მხოლოდ ორი სიტყვა – ,,პური და სანახაობა,” აი რას გვთავაზობს დღეს უზნეობა. ისტორია საკუთარ თავს ხშირად იმეორებს, სასიკვდილო ჭიდილში მყოფი ორი გლადიატორი ახლა სხვადასხვა ეროვნების დიჯეიმ ჩაანაცვლა, რომლებიც ფსიქოტროპული ზემოქმედების ხარჯზე მასების აყოლიებას ცდილობენ, ბრბოს მეტი არც უნდა, მთავარია გამოჩნდეს ჰამელინელი მესტვირე, რომელიც საკრავზე დაუკრავს, და ვირთხებიც მას გაჰყვებიან. ბევრი ფიქრობს, რომ ყირიმის დაკარგვა კაზანტიპურმა გარყვნილებამ გამოიწვია. აღვირახსნილთა ცოდვების გამო უკრაინა დაისაჯა.
ძვირფასო ქართველებო, დღეს თქვენი ქვეყანა გზის გასაყარზე დგას. ვინ იცის, მერამდენედ მოგიწევთ არჩევანის გაკეთება თეთრსა და შავს შორის. ნუ გადაიქცევით ბრბოდ, ნუ გაიყიდებით, ნუ გაცვლით თქვენს სამშობლოს და მომავალს ბინძურ, უზნეობით მოპოვებულ ფულზე, დარჩით ერად, აირჩიეთ ნათელი და კვლავინდებურად წინ გაგიძღვებათ მწყემსი კეთილი. ის შეგიფარებთ თავის ფარაში და შეგეწევათ დედა ღვთისმშობელთან ერთად. ,,მე ვარ მწყემსი, კეთილი, მწყემსმან კეთილმან სული თვისი დაჰსდვის ცხოვართათვის.” (იოანე 10, 11)
19.08.14
ახალმოსახლენი
