არასრულწლოვანთა მართლმსაჯულების კოდექსს 7 ქვეყნის დელეგაციები ეცნობიან

იუსტიციის სამინისტროს მიერ მომზადებული არასრულწლოვანთა მართლმსაჯულების ინოვაციური კოდექსის გასაცნობად საქართველოში 7 ქვეყნის დელეგაციები ჩამოვიდნენ. დელეგაციის წევრები „არასრულწლოვანთა მართლმსაჯულების კოდექსს“ ეცნობიან საერთაშორისო კონფერენციაზე − „მართლმსაჯულება ბავშვებისათვის“ საქართველოს არასრულწლოვანთა მართლმსაჯულების კოდექსის მიხედვით“. კონფერენციის სტუმრებს იუსტიციის მინისტრი თეა წულუკიანი მიესალმა; მინისტრის პირველმა მოადგილე ალექსანდრე ბარამიძემ კი დამსწრეებს „არასრულწლოვანთა მართლმსაჯულების კოდექსის“ მთავარი პრინციპები გააცნო. დელეგაციის წევრებს მიესალმნენ, ასევე, ევროკავშირის ელჩი საქართველოში იანოშ ჰერმანი, „UNICEF“-ის წარმომადგენელი საქართველოში საშა გრაუმანი და მოსამართლე რენატე ვინტერი (ევროკავშირის პროექტის − „სისხლის სამართლის სისტემის რეფორმის მხარდაჭერა საქართველოში“ − ხელმძღვანელი). კონფერენციას ესწრებოდა უზენაესი სასამართლოს თავმჯდომარე ნინო გვენეტაძე, რომელმაც ისაუბრა, თუ როგორ მოხდება სასამართლოს მიერ არასრულწლოვანთა მართლმსაჯულების კოდექსის აღსრულება. „არასრულწლოვანთა მართლმსაჯულების კოდექსის“ გასაცნობად სპეციალურად ჩამოვიდნენ დელეგაციები უკრაინიდან,  სომხეთიდან, ყირგიზეთიდან, ტაჯიკეთიდან, მოლდოვადან, ყაზახეთიდან და ბელარუსიდან. აღსანიშნავია, რომ არასრულწლოვანთა მართლმსაჯულების ქართული მოდელით არა მარტო აღმოსავლეთ ევროპის, არამედ დასავლეთის ქვეყნებიც, მათ შორის, საფრანგეთიც,  არიან დაინტერესებულნი. საქართველოს პარლამენტმა „არასრულწლოვანთა მართლმსაჯულების კოდექსი“ მიმდინარე წლის 12 ივნისს მიიღო. კოდექსი კანონთან კონფლიქტში მყოფი ბავშვებისთვის ნოვაციებს ამკვიდრებს. იგი ეყრდნობა შემდეგ ძირითად პრონციპებს:

არასრულწლოვანთა საქმეებს მხოლოდ სპეციალიზებული მოსამართლეები, პროკურორები, გამომძიებლები, პოლიციელები, ადვოკატები და სოციალური მუშაკები აწარმოებენ. არასრულწლოვნებთან მიმართებით ამოქმედდება მოწმის მხოლოდ სასამართლოში დაკითხვის წესი. კოდექსის ძალაში შესვლა დაგეგმილია 2016 წლის 1 იანვრიდან.