“ჩვენ არ ვიცით, რა რისკებს ხედავს ეროვნული ბანკი და რას გეგმავს ამ რისკების თავიდან ასაცილებლად,” – ამის შესახებ თსუ-ს ანალიზისა და პროგნოზირების ცენტრის გამგეობის თავმჯდომარე ოთარ ანგურიძემ განაცხადა.
ანგურიძემ „რეპორტიორის” პრესკლუბში გამართულ ბრიფინგზე აზერბაიჯანის ეროვნული ვალუტის გაუფსურებაზე ისაუბრა და განაცხადა, რომ აღნიშნულმა ვითარებამ შესაძლოა, საქართველოს ვალუტაზეც იქონიოს უარყოფითი გავლენა.
ოთარ ანგურიძიას განმარტებით, აზერბაიჯანი საქართველოსთვის სიდიდით მეორე სავაჭრო პარტნიორია, ამიტომ აზერბაიჯანის არამდგრადი ვალუტის კურსი გავლენას იქონიებს საქართველოზეც.
ოთარ ანგურიძე რისკების თავიდან ასაცილებლად პასუხისმგებლობას ეროვნულ ბანკს აკისრებს და აცხადებს, რომ ეროვნულმა ბანკმა საზოგადოებასთან მეტი კონტაქტი უნდა დაამყაროს და უფრო მეტი ინფორმაცია უნდა მიაწოდოს. წინააღმდეგ შემთხვევაში, ანგურიძე აცხადებს, რომ ინფორმაციის ნაკლებობა საზოგადოებაში პანიკას გამოიწვევს და ეროვნულ ვალუტას უფრო მეტი საფრთხე დაემუქრება.
„გუშინ აზერბაიჯანის ეროვნული ვალუტა თითქმის 50 %-ით გაუფასურდა. ეს გამოიწვია იმან, რომ აზერბაიჯანის ცენტრალურმა ბანკმა განაცხადა, რომ ისინი უნდა გადავიდნენ მცურავ გაცვლით კურსზე. სიტუაციის ბუნებრივ პროცესზე გადაყვანამ გამოიწვია აზერბაიჯანული მანათის ერთ დღეში 50 %-ით გაუფასურება. იქამდე აზერბაიჯანული მანათი დამოკიდებული იყო ნავთობზე და ენერგეტიკულ შესაძლებლობებზე. ვხედავთ, რომ ბოლო პერიოდში საკმაოდ დაიწია ნავთობის ფასმა. ეს ნიშნავს, რომ აზერბაიჯანისთვის ეროვნული ვალუტის ნავთობზე მიბმა სტაბილური აღარ იყო. ამიტომ გადაწყვიტეს, გადაედგათ ეს ნაბიჯი. ბუნებრივია, გვინდა თუ არა, ეს ჩვენს ვალუტაზეც აისახება. აზერბაიჯანი სავაჭრო ურთიერთობებით, დღევანდელი სტატისტიკური მონაცემებით, არის სიდიდით მეორე სავაჭრო პარტნიორი.
იმისთვის, რომ აზერბაიჯანიდან წამოსული ნეგატივები შედარებით შემსუბუქდეს, ამაზე პასუხისმგებლობა უნდა აიღოს ეროვნულმა ბანკმა. ეროვნული ბანკია პასუხისმგებელი სავალუტო კურსის სტაბილურობაზე. პირველ რიგში, ეროვნულმა ბანკმა უნდა გაითვალისწინოს საერთაშორისო სავალუტო ფონდის მოთხოვნები. ასევე ფინანსური სტაბილურობის ანგარიში უნდა გამოაქვეყნოს, რომელიც 2011 წლის შემდეგ არ გამოუქვეყნებია. ჩვენ არ ვიცით, რა რისკებს ხედავს ეროვნული ბანკი და რას გეგმავს ამ რისკების თავიდან ასაცილებლად. ეროვნულ ბაკნს უნდა ჰქონდეს მეტი კომუნიკაცია საზოგადოებასთან, რათა არ შეიქმნას პანიკა. ვნახეთ, რომ ნაკლებმა კომუნიკაციამ შარშან ვალუტაზე შეტევა მოიტანა. მომხმარებელში შეიქმნა პანიკა, რადგან მათ არ ჰქონდათ საკმარისი ინფორმაცია. ეროვნულმა ბანკმა საზოგადოებას უნდა ამცნოს, თუ როგორ აპირებს ამა თუ იმ პრობლემის გადაწყვეტას”, – განაცხადა ოთარ ანგურიძემ.
