წმინდა ნინო ქრისტიანობის გამავრცელებელი და მქადაგებელია საქართველოში. მის სახელთან არის დაკავშირებული მრავალი სასწაული. ვინაიდან დღეს 27 იანვარს მართლმადიდებელი ეკლესია მისი აღსრულების დღეს აღნიშნავს, თქვენს ყურადღებას შევაჩერებ ბოდბის წმინდა ნინოს სახელობის დედათა მონასტერზე, სადაც განისვენებს წმინდანი.
ისტორიიდან ვიცით, რომ კახეთში ქადაგებისას წმინდა ნინო უკურნებელი სენით, მალარიით დაავადდა და 332 წელს – 31 წლის ასაკში, კახეთში, დაბა ბოდბეში გარდაიცვალა. არის მოსაზრება, რომ წმინდანი გარდაიცვალა საგარეჯოში, სოფელ ნინოწმინდაში. თუმცა ისტორიულად გარდაცვალების ადგილის სახელწოდებაა კუხეთი, დაბა „ბოდისი“.
მირიან მეფემ წმ. ნინოს დაკრძალვის ადგილას ეკლესია ააშენა. სწორედ ამ ტაძარს და წმინდანის საფლავს შესწირა თავისი სამეფო განძის ნახევარი. ბოდბეში აგებულ თავდაპირველ ეკლესიას ჩვენამდე არ მოუღწევია. მოგვიანებით აქ ახალი ტაძარი აიგო, რომელმაც მრავალჯერ გადაკეთებული სახით მოაღწია ჩვენამდე. ბოდბის მონასტერს გამორჩეული ადგილი უკავია საქართველოს სულიერ ცხოვრებაში, ამის მიზეზი, რა თქმა უნდა, ისაა, რომ აქ განისვენებს ქართველთა განმანათლებელო, მოციქულთა სწორი წმინდა ნინო. მონასტერი ოდითგანვე არა მარტო სულიერ, არამედ კულტურულ-საგანმანათლებლო კერასაც წარმოადგენდა. XVII საუკუნიდან აქ მოქმედებდა სასულიერო სასწავლებელი, რომელშიც გარდა საღვთისმეტყველო საგნებისა, საერო მეცნიერებებიც ისწავლებოდა.
აქვე იყო საქართველოში ერთ-ერთი უმდიდრესი წიგნთსაცავი. 1924 წელს კომუნისტებმა მონასტერი დახურა და საავადმყოფოდ გადააკეთეს. სხვადასხვა კაბინეტებთან ერთად, აქ ფუნქციონირებდა რენტგენოგრაფიის კაბინეტიც, სადაც ღვთისმშობლის ხატს ოთახში მაგიდის ზედაპირად იყენებდნენ. ბოდბის წმინდა ნინოს დედათა მონასტერში მონაზვნური მოღვაწეობა 1991 წელს განახლდა და იწყება მონასტრის აღორძინება:
შეიმკო და გამშვენდა წმიდა ნინოს საფლავი. ჯერ კიდევ XIX საუკუნეში საფლავის ძველი ქვა მარმარილოს ლუსკუმით შეცვალა ხატმწერმა მიხეილ საბინინმა. 
დედათა მონასტრის ერთ-ერთი სასწაული წმინდა ნინოს წყაროა. მონასტრიდან დაახლოებით 3 კმ-ში მდებარეობს. გადმოცემის მიხედვით, ის წმიდა ნინოს ლოცვით აღმოცენებულა. ამ წყალში განბანვის შემდეგ უამრავი სულიერად და ფიზიკურად დავრდომილი ადამიანი განკურნებულა. ამ ადგილზე აშენებულია განსაბანი და წმინდა ზებულონისა და სოსანას სახელობის პატარა ტაძარი.
ბოდბის დედათა მონასტრიდან წყარომდე ულამაზესი კიბეები ჩადის. აღსანიშნავია ის ფაქტი, რომ მრავალი ჩამსვლელის, ავადმყოფის და სნეულის მიუხედავად, არ ფიქსირდება არანაირი დაავადების გადადების ალბათობა. ამბობენ, რომ მას ნაკურთხი წყლის ძალა აქვს. ასევე, წმინდა ნინოსთან, საქართველოში მისი მისიონერული მოღვაწეობის დაწყებასთან ასოცირდება ჯვარი ვაზისა. ის საქართველოს მართმადიდებელი ეკლესიის მნიშვნელოვანი სიმბოლოა.
ნინოს ჯვარი დღეს თბილისის სიონის საკატედრო ტაძარშია დაბრძანებული. ჯვარს XVIII საუკუნის დასაწყისის ვერცხლის პერანგი აქვს და ვერცხლისავე კიდობანშია მოთავსებული. კიდობანზე წმიდა ნინოს ცხოვრების ამსახველი სცენებია გამოსახული. ყოველ, 27 იანვარს, სიონიში ნინოობის დღესასწაულის აღსანიშნავად საზეიმო მასახურება აღევლინება, სადაც ვაზის ჯვარს გამოაბრძანებენ და მასთან მიახლების შესაძლებლობა ეძლევა მორწმუნეებს.
სოფიკო ნინიკაშვილი
