საქართველოს საგარეო საქმეთა მინისტრის მოადგილემ დავით ჯალაღანიამ შეხვედრა გამართა იორდანელი ბიზნესმენების დელეგაციასთან.
ბიზნესმენთა ჯგუფი საქართველოს საქმიანი ვიზიტით, საგარეო საქმეთა სამინისტროს მიერ წარმოებული ეკონომიკური დიპლომატიის მიმართულების ფარგლებში სტუმრობს. ვიზიტის ორგანიზატორი იორდანიაში საქართველოს საელჩო და საქართველოს სავაჭრო-სამრეწველო პალატაა და მისი მიზანია საქართველოს ბიზნეს და საინვესტიციო შესაძლებლობების გაცნობა.
შეხვედრაზე საქართველოს საგარეო საქმეთა მინისტრის მოადგილე მიესალმა იორდანული მხარის დაინტერესებას საქართველოთი და დელეგაციას მიაწოდა ინფორმაცია საქართველოში არსებულ პოლიტიკური და ეკონომიკურ ვითარებისა და მიმდინარე რეფორმების შესახებ, ასევე მიმოიხილა საქართველო-იორდანიის სავაჭრო-ეკონომიკური ურთიერთობები.
ვიზიტის ფარგლებში ბიზნეს დელეგაცია ასევე გამართავს შეხვედრებს სხვადასხვა დარგობრივ სამინისტროსთან, სააგენტოებთან და ფონდებთან.
დელეგაციის შემადგენლობაში შედიან იორდანიის ბიზნეს ასოციაციისა და ექსპორტიორთა ასოციაციის წარმომადგენლები, ასევე 10-მდე მსხვილი იორდანული კომპანიის ხელმძღვანელები.
„საქართველოს საგარეო საქმეთა სამინისტრო, ეკონომიკური დიპლომატიის ფარგლებში აგრძელებს თანამშრომლობას თავის პარტნიორ ქვეყნებთან და დღეს ერთერთი წარმატებული მაგალითია, იორდანიის ბიზნეს წრეების წარმომადგენლების სტუმრობა ჩვენს ქვეყანაში. დელეგაციის შემადგენლობაში წარმოდგენილნი არიან საკმაოდ მსხვილი ბიზნესმენები, იორდანიის სხვადასხვა ეკონომიკის სფეროდან, როგორიც არის მრეწველობა, სოფლის მეურნეობა, ტექსტილი, სასტუმრო ინფრასტრუქტურა.
ჩვენ იმედი გვაქვს, რომ შედგენილი პროგრამა, რომელიც საკმაოდ დატვირთულია და ის შეხვედრები, რომელსაც იორდანელი ბიზნესმენები გამართავენ, როგორც სახელმწიფო სტრუქტურებთან, ისე თავიანთ კოლეგებთან, გამოიწვევს დაინტერესებას მათი მხრიდან საქართველოში ბიზნეს აქტივობების განსახორციელებლად, ასევე ხელს შეუწყობს ორმხრივი, ერთობლივი საწარმოების შექმნას და ჩვენს ქვეყნებს შორის სავაჭრო და ეკონომიკური თანამშრომლობის კიდევ უფრო განვითარებას“- განაცხადა მინისტრის მოადგილემ, დავით ჯალაღანიამ შეხვედრის შეფასებისას.