საქართველოს სამოციქულო ავტოკეფალურ მართლმადიდებელ ეკლესიასა და სოფლის მეურნეობის სამეცნიერო-კვლევით ცენტრს შორის ურთიერთთანამშრომლობის მემორანდუმი გაფორმდა, რომელიც ითვალისწინებს მევენახეობა–მეღვინეობის ტრადიციული მეთოდების მეცნიერულ შესწავლას, ვაზის ქართული ჯიშების მოძიებასა და პოპულარიზაციას.
“მემორანდუმის მიზანია მევენახეობა–მეღვინეობის დარგში ტრადიციული მეთოდების მეცნიერული კვლევა და მათი შედეგების პრაქტიკაში დანერგვა, ვაზის ადგილობრივი უნიკალური ჯიშების პოპულარიზაცია, ე.წ. არატრადიციულ ზონებში (ქართული ისტორიული დიასპორის ტერიტორიაზე) ვაზის ქართული, ენდემური ჯიშების მოძიება–გაშენება. ურთიერთთანამშრომლობის მემორანდუმი ხელს შეუწყობს საქართველოს ავტოკეფალური მართლმადიდებელი ეკლესიის ეპარქიებში სამონასტრო მევენახეობა-მეღვინეობის მიმართულების განვითარებას.”– ნათქვამია საპატრიარქოს განცხადებაში.
ურთიერთთანამშრომლობის ფარგლებში დაიგეგმა 7 აპრილს ისტორიული ლაზეთის 5 ქალაქში კვლევითი ცენტრის ჯიღაურას სანერგეში ნაწარმოები ლაზური ვაზის სხვადასხვა ჯიშის ნერგების დარგვა, რომელიც კათოლიკოს-პატრიარქმა, უწმინდესმა და უნეტარესმა ილია მეორემ აკურთხა.
სოფლის მეურნეობის სამეცნიერო–კვლევითი ცენტრის დირექტორმა ლევან უჯმაჯურიძემ სრულიად საქართველოს კათოლიკოს–პატრიარქს საჩუქრად გადასცა მათ მიერ აღდგენილი და გამრავლებული თავთავიანი კულტურების, მათ შორის ქართული ხორბლის ენდემური სახეობები და ჯიშები, ასევე ვაზის იშვიათი ჯიშებისგან დამზადებული ღვინის ნიმუშები.
სოფიკო ნინიკაშვილი
