„შეირყა ხაჯინბას პოზიციები, ამის მთავარი მიზეზი სოციალური ფაქტორი და კორუფციაა. ამ ეტაპზე რაულ ხაჯინბამ ერთი რაუნდი მოიგო, ის გაიმყარებს პოზიციებს და მოსახლეობის მხარდაჭერას იგრძნობს“. აფხაზეთში ე.წ რეფერენდუმის ჩატარების შედეგებზე და მიმდინარე პოლიტიკური პროცესების საქართველოზე გავლენის შესახებ შერიგების და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა ტელეკომპანია „მაესტროს“ ეთერში, გადაცემა „მაესტროს ფაქტორში“ ისაუბრა.
აფხაზეთის ტერიტორიაზე მნიშვნელოვანი და საინტერესო პროცესები მიდის. თუმცა სიახლე მოსახლეობისთვის არ არის. ავანსცენაზე ძველი ძალები არიან. ერთი უბედურობა მეორით იცვლება. ახალგაზრდები არ არიან, ჯერ კიდევ საბჭოთა პერიოდში ჩამოყალიბებული ძალებია. შესაბამისად, მოსახლეობისთვის პრინციპულად არ არის მნიშვნელოვანი მათთვის მიუღებელ რომელ ძალას დაუჭერენ მხარს. ოპოზიციის ელიტა მოწყდა საზოგადოების ინტერესებს. ე.წ რეფერენდუმმა აჩვენა, რომ მოსახლეობა არ არის დაინტერესებუილ არსებითი ცვლილებებით. ვერ ხედავენ ამის აუცილებლობას.
მოსახლეობაში გაჯერებულია განცდა, რომ კორუფციას ვერავინ ერევა. კრემლს უნდა დააჯეროს მოსახლეობა, რომ რუსეთი ზრუნავს მასზე, თუმცა მოქალაქეებამდე ფული არ მიდის. სოციალური მდგომარეობა დამძიმდა და ამით ისარგებლა იმ ხალხმა, ვინც თავის დროზე დაკარგა ხელმისაწვდომობა ფულის წყაროზე. არ გამოვრიცხავ, რომ კრემლს აწყობდეს ვინმე სხვა, მაგრამ ეს სხვა არ ჩანს. ის ფარულად მოქმედებს, თუმცა აშკარა და გარდაუვალი ესკალაციის დროს იძულებულია უშუალოდ გამოჩნდეს, თავისი ხალხი გაუშვას და სიტუაცია დააწყნაროს.
ჩვენ ყველა ძალასთან გვაქვს თანაბარი ურთიერთობები.ბევრი ფაქტორი აჩვენებს,რომ აფხაზეთის მოსახლეობა საქართველოს მტრულად აღარ აღიქვამს.არეულობა აძლიერებს მოსკოვის პოზიციებს, ჩვენ გვაწყობს სტაბილურობა. რაც უფრო სიმშვიდეა აფხაზეთის რეგიონში, მეტად გახსნილია საზოგადოება, მეტი ადამიანი მოძრაობს. არიან პოლიტიკური ფიგურები,რომლებიც აღიარებენ,რომ საქართველო სწორ გზაზე დგას. ისინი ფიქრობენ,რომ საქართველოს ევროინტეგრაციისკენ სწრაფვის ფონზე, ჯობს ბოლომდე არ გაწყვიტონ ურთიერთობები. უნიკალური შემთხვევაა,რომ ოთხოზორიას მკვლელობაში ეჭვმიტანილი დასჯილია. რა თქმა უნდა შინა პატიმრობა არ არის დამაკმაყოფილებელი, თუმცა ადრე ესეც არ ხდებოდა“.
პაატა ზაქარეიშვილმა მომავალი პარტიული გეგმების შესახებაც ისაუბრა.
„ოთხი წლის განმავლობაში ჩემი მთავარი მიზანი იყო ვყოფილიყავი მთავრობის წევრი და მინიმუმამდე დამეყვანა პოლიტიკური, პარტიული საქმიანობა. პარტიას ყავს თავისი ხელმძღვანელობა,რომელიც მოლაპარაკებებს აწარმოებს. გადაწყვეტილება სულ რამდენიმე დღეში გახდება ცნობილი. თუმცა ჩემთვის არ არსებობს ნიადაგი,სადაც ჩემ თავს ვერ ვიპოვი“.
მანანა ღოღობერიძე
