ქართველი პარალიმპიელები ზვიად გოგოჭური და მოცურავე ლია ჩაჩიბაია დელეგაციის სხვა წევრებთან ერთად რიოში 31 აგვისტოს გაემგზავრებიან”, – ამის შესახებ ”თბილისი თაიმსს” სპორტისა და ახალგაზრდობის საქმეთა სამინისტროდან აცნობეს.
უწყების ინფორმაციითვე, დიღომში მდებარე ძიუდოს აკადემიის მიმდებარე ტერიტორიაზე არსებულ პარაცენტრს სპორტისა და ახალგაზრდობის საქმეთა მინისტრი ტარიელ ხეჩიკაშვილი, თბილისის მერი დავით ნარმანია და BP-ს საგარეო ურთიერთობათა დირექტორი გია ღვალაძე სტუმრობდნენ. სტუმრები რიოს ზაფხულის პარალიმპიური თამაშების ლიცენზიანტებს შეხვდნენ. ლიცენზიანტებთან შეხვედრის შემდეგ პარაფეხბურთელთა და პარაფრენბურთელთა მატჩი გაიმართა, რომელშიც მონაწილეობა საქართველოს ნაკრების წევრებმა მიიღეს. დაჭრილი სამხედროებით დაკომპლექტებულმა პარაფრენბურთელთა გუნდმა იტალიაში გამართულ საერთაშორისო ტურნირზე მეორე ადგილი დაიკავა. სტუმრები ასევე შეხვდნენ მოფარიკავე ირმა ხეცურიანს და პარამშვილდოსნებს, რომლებიც იმავე ცენტრში ვარჯიშობენ.
”თბილისის პარაცენტრი ქალაქ თბილისის მერიის დაფინანსებით აშენდა. შენობა შშმ პირებზე სრულად ადაპტირებული ერთადერთი პარასპორტული არენაა საქართველოში და მასში ფუნქციონირებს 18X38 ზომის სათამაშო სახეობების მოედანი, 525 კვ.მ საწვრთნელ-სარეაბილიტაციო დარბაზი, სარეაბილიტაციო აუზი, ასევე სარეაბილიტაციო მიმართულების მქონე სატრენაჟორო თერაპიული კუთხე. ცენტრში ფუნქციონირებს ფსიქოლოგის, მანუალური თერაპიის და ორთოპედული კაბინეტები. ამ ეტაპზე ა(ა)იპ ”თბილისის პარასპორტის განვითარების ცენტრში” საწვრთნელ-სარეაბილიტაციო პროცესში ჩართულია ასამდე პარასპორტსმენი და თვრამეტი მწვრთნელ-მასწავლებელი. ცენტრში ვითარდება 9 პარასპორტული სახეობა”,- აცხადებენ სამინისტროში.
