რელიგიის სააგენტოს საქამიანობაზე მესამე სექტორის მიერ გაკეთებულ ბრალდებებსა, შეურაცხმყოფელ ბრალდებებსა და უარყოფით შეფასებებს გამოეხმაურნენ „ქართველთა და ებრაელთა მეგობრობის“ მუზეუმში შეკრებილი რელიგიური დენომინაციები.
საქართველოს საპატრიარქოს, საქართველოს მუსლიმთა სამმართველოს, სომეხთა მართლმადიდებელი ეკლესიის, საქართველოს ევანგელურ-პროტესტანტული ეკლესიის, საქართველოს ევანგელურ-ბაპტისტური ეკლესიის, საქართველოში ეზიდთა სასულიერო საბჭოსა და საქართველოს ებრაელთა კავშირის წარმომადგენლები ხაზგასმით აღნიშნეს, რომ მათ საქმნიანობაში სახელმწიფო არასდროს ჩარეულა, პირიქით ის ყოველთვის ცდილობს დაიცვას და დაეხმაროს რელიგიურ ორგანიზაციებს; მიუღებელია გარკვეული ორგანიზაციების მხრიდან გავრცელებული უპასუხისმგებლო განცხადებები, თითქოს ხელისუფლება რელიგიის სააგენტოს მეშვეობით აკონტროლებს მათ.
პატრიარქოს პრესმდივანმა, მიქაელ ბოტკოველმა განაცხადა, რომ მსგავსი მშვიდი სიტუაცია რელიგიის თავისუფლების კუთხით საქართველოში არ ყოფილა. არქიმანდრიტი ხოსენ ჰოვანესიანმა ბრიფინგზე აღნიშნა, რომ სააგნეტოს არსებობა საჭიროა. „ვიდრე ის დაარსდებოდა არც კი ვიცოდით ვისთვის მიგვემართა ჩვენი პრობლემების გადასაჭრელად. დავდიოდით ცალკეულ უწყებებში და პასუხებს ვერ ვპოულობდით. სააგენტოს დაარსების შემდეგ თავი სრულყოფილ მოქალაქეებად ვიგრძენით. სახელმწიფო ანგარიშს გვიწევს და გვესაუბრება“-აღნიშნა მან.
სრულიად საქართველოს შეიხმა ბრიფინგზე აღნიშნა, რომ რელიგიურ ორგანიზაციებსა და სახელწმიფოს შორის ურთიერთობაში არანაირი პრობლემა არ არსებობს, პირიქით რელიგიის სააგენტო დაარსების დღიდან არაერთი პრობლემის მოგვარებაში დაგვეხმარა და ეს პროცესი ისევ გრძელდება.
“გასათვალისწინებელია, რომ ას წელზე დიდი ხნით ადრე დაგროვილ პრობლემებს სახელმწიფო ორ-სამ წელიწადში ერთიანად ვერ მოგვარებდა და ეს ყველამ უნდა გაცნობიეროს. რაც შეეხება ერთი ან ორი მუსლიმი არასამთავრობო ორგანიზაციის ხელმძღვანელის მიერ გაკეთებულ განცხადებას, ეს მთელი მუსლიმი თემის სახელით ვერანაირად ვერ აღიქმება, რადგან მუსლიმი თემის სახელით მხოლოდ სასულიერო ლიდერებს და მეჩეთების წინამძღვრებს შეუძლიათ საუბარი, რადგან მათ უკან მრევლი დგას.“-აღნიშნა რამინ იგიდოვმა.
ბრიფინგზე დამსწრე 8 რელიგიურმა დენომინაციამ, არსებული გამოწვევების მიუხედავად რელიგიის სააგენტოს საქმიანობა დადებითად შეაფასეს და აღნიშნეს, რომ მათ რელიგიური ჯგუფების წარმომადგენელთა შევიწროების ცალკეული შემთხვევების აღმოსაფრთხველად მომავალში ბევრი სამომუშაო აქვთ ჩასატარებელი.
„ჩვენთვის სრულიად მიუღებელია ის ბრალდებები, რაც ბოლო პერიოდში რელიგიური ორგანიზაციების მიმართ ისმის, რომ თურმე ხელისუფლება ჩვენს საქმიანობაში ერევა და გვაკონტროლებს, თუკი ეს ჩვენი უფლებების დასაცავადაა ნათქვამი, ამგვარი განცხადებებით პირიქით ცდილობენ აღნიშნული ორგანიზაციები, ჩვენი რელიგიური გრძნობების შეურაცხყოფას, ჩვენს დაკნინებას, ჩვენი ავტორიტეტის დაცემას მრევლში და არანაირად არ ემსახურება ჩვენი უფლებების განმტკიცებას. ჩვენ გვაქვს გადასაწყვეტი მრავალი საკითხი, სულ ცოტა ხნის წინ ვანდალური აქტი მოხდა გორში, სადაც სინაგოგა გაძარცვეს. მოსაგვარებელია ქართველი მუსლიმებისთვის ლოცვის განხორციელების საკითხი ადიგენის რაიონის სოფელ მოხეში. არის სხვადასხვა რელიგიური ჯგუფების წარმომადგენელთა შევიწროების ცალკეული შემთხვევები, ამ თვალსაზრისით, ჩვენ რელიგიური ორგანიზაციების წარმომადგენლებს კიდევ ძალიან დიდი სამუშაო გვაქვს ჩასატარებელი. თუმცა ეს არ ნიშნავს იმას, რომ საქართველოს სახელმწიფო არაფერს აკეთებს ამ საკითხების გადასაწყვეტად. ჩვენ კომუნიკაციის რეჟიმში ვართ ხელისუფლებასთან და ერთობლივად ვცდილობთ პრობლემათა გადაწყვეტას. ამის საუკეთესო ნიმუშია მუსლიმთათვის გადაცემული 150-ზე მეტი მეჩეთი, დაბრუნებული სინაგოგები, სალოცავები, სარემონტო სამუშაოები, საბჭოთა პერიოდში მიყენებული მატერიალური თუ მორალური ზარალის ასანაზღაურებლად გამოყოფილი თანხები, რომელსაც ჯერ მხოლოდ რამდენიმე კონფენსია იღებს და იმედია, მათ რიცხვს მალე სხვებიც შეუერთდებიან. სახელმწიფო ცდილობს, განამტკიცოს ტოლერანტობის ის სულისკვეთება, რაც ჩვენს ტრადიციებშია და რის შებღალვასაც ცდილობენ სამწუხაროდ რიგი არასამთავრობო ორგანიზაციები“, -აღნიშნულია რელიგიური დენომინაციების მიერ გაკეთებულ განცხადებაში.
შეგახსენებთ, რომ რელიგიური დენომინაციების განცხადებას წინ უძღოდა „ქართველ მუსლიმთა კავშირის“ თავმჯდომარის ტარიელ ნაკაიძის მოთხოვნა რელიგიის სააგენტოს გაუქმების შესახებ და „ადამიანის უფლებების სწავლებისა და მონიტორინგის ცენტრის“ მიერ გამოქვეყნებული კვლევა, სადაც აღნიშნულია, რომ ბოლო პერიოდში რელიგიური თავისუფლების კუთხით მგომარეობა გაუარესებულია. „საქართველოში რელიგიის თავისუფლების კუთხით დგომარეობა გაუარესებულია, რასაც მუსლიმი თემის მიმართ გამოვლენილი რელიგიური კონფლიქტები, ასევე იეჰოვას მოწმეების მიმართ ძალადობის ზრდის ფაქტები ადასტურებს. წლების განმავლობაში დაგროვილი პრობლემები, რომელიც ქვეყანაში არსებობს, კვლავ გადაუჭრელია,“ – განაცხადა ორგანიზაციის წარმომადგენელმა თამთა მიქელაძემ.
ტარიელ ნაკაიძე თვლის რომ სააგენტო უმცირესობებისთვის და ქვეყნის განვითარების თვალსაზრისით სერიოზული დამაბრკოლებელი უწყებაა. მისი თქმით მუსლიმ თემში არსებობს მეორეხარისხოვანი მოქალაქეების შეგრძნება, ამას კი ხელს უწყობს სწორედ რელიგიის საკითხთა სააგენტო.
ტარიელ ნაკაიძე-„ ეს სააგენტო შეიქმნა იმ მიზნით, რომ უნდა იყოს რეკომენდატორი სახელმწიფოსა და რელიგიურ ორგანიზაციებს შორის. თუმცა მოგვევლინა როგორც მაკონტროლებელი ორგანიზაცია და უშუალო მონაწილე, მხარე წარმოქმნილი პრბლემების დროს. ეს მნიშვნელოვან პრობლემას წარმოადგენს ქვეყანაში“.
სოფიკო ნინიკაშვილი
