თბილისის მერიის გადაწყვეტილებით, ბარბარობის დღესასწაულთან დაკავშირებით, 17 დეკემბერს, 10:00-დან 15:00 საათამდე მახათას მთაზე, ივერიის ყოვლადწმინდა ღვთისმშობლის ხატის სახელობის ტაძარის მიმართულებით, ავტობუსები უფასოდ იმოძრავებენ.
დედაქალაქის მერიის ინფორმაციით, მსურველებს ვარდების მოედნიდან 8, რკინიგზის გადასასვლელი ხიდიდან 3 და მეტრო „ვარკეთილიდან“ – 3 ავტობუსი მოემსახურება.
მახათას მთაზე, ივერიის ყოვლადწმინდა ღვთისმშობლის ხატის სახელობის მშენებარე ტაძარში, 17 დეკემბერს სრულიად საქართველოს კათოლიკოს-პატრიარქი ილია II პარაკლისს გადაიხდის და ბავშვებს დალოცავს.
საპატრიარქოს ინფორმაციით, 12:00 საათზე უწმინდესი და უნეტარესი სრულიად საქართველოს კათოლიკოს-პატრიარქი ილია II გადაიხდის პარაკლისს, დალოცავს ბავშვებს და სრულიად საქართველოს. ამ დღეს პირველად დაირეკება მახათის მთის ღვთისმშობლის ხატის სახელობის ტაძრის ზარები.
