გიორგი გახარია – ჩვენ საქართველოს აღვიქვამთ და ვუყურებთ როგორც კარიბჭეს, არა მხოლოდ კავკასიის, არამედ შუა აზიის, ევროპის, დასავლეთ და აღმოსავლეთ ბაზრებზე წვდომისთვის

ჩვენ საქართველოს აღვიქვამთ და ვუყურებთ როგორც კარიბჭეს, არა მხოლოდ კავკასიის, არამედ შუა აზიის, შემდგომ ევროპის და უფრო მსხვილ დასავლეთ და აღმოსავლეთ ბაზრებზე წვდომისთვის, – ამის შესახებ საქართველოს პრემიერ-მინისტრმა გიორგი გახარიამ თბილისის „აბრეშუმის გზის ფორუმზე“ განაცხადა.

გიორგი გახარიას თქმით, მნიშვნელოვანია რეგიონში არსებული მულტინაციონალური მოთამაშეებისთვის სტაბილური, პროგნოზირებადი და მიმზიდველი გარემოს შექმნა.

„მნიშვნელოვანია რეგიონში არსებული მულტინაციონალური მოთამაშეებისთვის სტაბილური, პროგნოზირებადი და მიმზიდველი გარემოს შექმნა. არასატარიფო ბარიერების მოხსნა, საზღვრის კვეთის და ადმინისტრაციული პროცედურების შემსუბუქება.

ხაზგასასმელია, რომ ამ მხრივ საქართველო მსოფლიოში ერთ-ერთი ყველაზე ლიბერალური სავაჭრო პოლიტიკის გამტარებელია. იმპორტირებული საქონლის 80%-ზე მეტი ნულ პროცენტიანი გადასახადით იბეგრება, გამარტივებულია საბაჟო პროცედურები და მინიმალურია არასატარიფო ბარიერები.

საქართველო როგორც მხოლოდ სამი და შვიდი მილიონიანი სამომხმარებლო ბაზარი შესაძლოა, ვინმემ არამიმზიდველად მიიჩნიოს. თუმცა, თუ შევხედავთ საქართველოს როგორც რეგიონალურ ჰაბს, მნიშვნელოვან განსხვავებას მივიღებთ და ჩვენ საქართველოს აღვიქვათ და ვუყურებთ როგორც კარიბჭეს არა მხოლოდ კავკასიის, არამედ შუა აზიის, შემდგომ ევროპის და უფრო მსხვილ დასავლეთ და აღმოსავლეთ ბაზრებზე წვდომისთვის.

ხელსაყრელ საინვესტიციო გარემოსთან ერთად საქართველოში თქვენ დაგხვდებათ საინვესტიციო პრეფერენციები, რაც გაძლევთ საშუალებას 2 და 3 მილიარდიანი სამომხმარებლო ბაზრებზე წვდომისთვის. ამ ბაზრების ძირითადი ინფრასტრუქტურა იქმნება იმ თავისუფალი ვაჭრობის ხელშეკრულებებით, რომელიც საქართველოს უკვე აქვს. ეს არის როგორც მოგახსენეთ ჩინეთის რესპუბლიკასთან თავისუფალი ვაჭრობის შესახებ ხელშეკრულება, ეს არის ევროკავშირთან თავისუფალი ვაჭრობის შესახებ ხელშეკრულება, ეს არის დსთ-ს ქვეყნებთან თავისუფალი ვაჭრობის ხელშეკრულება, თურქეთთან, უკრაინასთან, ასევე ხაზგასმით უნდა აღვნიშნო ის მოლაპარაკებები, რომელიც დღეს მიმდინარეობს თავისუფალი ვაჭრობის შესახებ ინდოეთთან და ისრაელთან. შესაბამისად, საქართველოს, თავისი სტრატეგიული მდებარეობით ევროპასა და აზიას შორის კარგად განვითარებული სატრანსპორტო და საბაჟო ინფრასტრუქტურით ბიზნესზე მორგებული პოლიტიკით ძლიერი რეგიონული და რეგიონს გარე სავაჭრო ურთიერთობებით, აქვს უზარმაზარი პოტენციალი გახდეს ჰაბი და როგორც ისტორიულად, დღესაც განაგრძოს, შეასრულოს მნიშვნელოვანი როლი აღმოსავლეთს და დასავლეთს შორის ვაჭრობის ხელშესაწყობად“, – განაცხადა გიორგი გახარიამ.