დღე, რომელსაც ბევრი 12 წლის მანძილზე ელოდა – „ბოლო ზარი“ წელს არ დარეკილა იმ ფორმით, რა ფორმითაც წლებია, სიმბოლური ხასიათი აქვს. იუმორნარევი მოქმედებებით, „ბოლო ზარი“ ზოგიერთი მეთორმეტეკლასელისთვის მაინც სახალისოდ და დასამახსოვრებლად დაირეკა.
სკოლების, დირექტორებისა და მასწავლებლების გარკვეულმა ნაწილმა მოსწავლეების გასახალისებლად სხვადასხვა მეთოდი მოიფიქრა – ეს ყველაფერი ვირტუალურად: ვირტუალური პერანგები წარწერებით, მასწავლებლების პაროდიები ვირტუალურად, თანაკლასელებისთვის განკუთვნილი სახალისო სერთიფიკატები ვირტუალურად და ა.შ.
რას ფიქრობენ თავად მეთორმეტეკლასელები წლევანდელი „ბოლო ზარის“ განსაკუთრებულობაზე? „თბილისი თაიმსი“ რამდენიმე მათგანს ესაუბრა და გაირკვა, თუ რა მხრივ გადაიკვეთა მათი შეხედულებები, იმედგაცრუება და დანაკლისი.
პირველი, რავ გამოჩნდა, არის ის, რომ ისინი ამ დღეს, უბრალოდ, „გადაავადებენ“, რაც იმას ნიშნავს, რომ სკოლის ბოლო ზარი მათთვის დაგვინებით, თუმცა მაინც დაირეკება და გამოსაშვები საღამოც აუცილებლად შედგება.
გამოიკვეთა ფაქტები, რომლებმაც ისინი საკმაოდ გაახალისა – ზოგიერთმა მათგანმა, საკუთარ თანაკლასელებთან ერთად, შექმნა ვიდეორგოლები, რომლებიც მიეძღვნა უკვე ჩვეულებად ქცეულ, მასწავლებლების პაროდიებს. მათ ამას განსაკუთრებული დრო დაუთმეს და ერთმანეთი გაახალისეს.
სოციალურ ქსელებში იმ მეთორმეტეკლასელების ვიდეოებიც ვრცელდება, რომლებმაც, ასე თუ ისე, მაინც ვერ თქვეს უარი ნანატრ „ბოლო ზარზე“, თან, არც რეკომენდაციები უარყვეს და თეთრ, წარწერებიან პერანგებს პირბადეები შეუხამეს. გარდა ამისა, ვიდეოჩანაწერებიც არის ხელმისაწვდომი, თუ როგორ ულოცავენ ცნობილი ადამიანები მოსწავლეებს სკოლის დასრულებას. მოკლედ რომ ვთქვათ, ბავშვებისთვის ეს დღე მაინც დარჩა გამორჩეულ დღედ.
“ბოლო ზარი” “ზუმის” აპლიკაციით – გამორჩეული მეთოდი ამ დღის აღსანიშნად. აღნიშნული პროგრამის სწავლის პროცესის ჩატარება ბევრი მოსწავლისთვის არაკომფორტული აღმოჩნდა, თუმცა ამ ფორმით დარეკილმა ზარმა ისინი გაახალისა.
2020 წლის სასწავლო წელი დამამთავრებელი კლასის მოსწავლეებისთვის ორიგინალური რომ ყოფილიყო, ამისთვის სკოლების თანამშრომლებმა კრეატივს მოუხმეს და ეს დღე მაინც გაუხალისეს მეთორმეტეკლასელებს. განათლების მინისტრმა, მიხეილ ჩხენკელმა ბავშვებს მიულოცა ეს მნიშვნელოვანი დღე და ცხოვრების ახალ ეტაპზე ბევრი წარმატება უსურვა მათ.
„ჩემო ახალგაზრდა მეგობრებო, გილოცავთ თქვენი ცხოვრების ერთ-ერთ უმნიშვნელოვანეს მოვლენას – სკოლის დამთავრებას. ალბათ, ბევრჯერ გიფიქრიათ, როგორი იქნებოდა თქვენი “ბოლო ზარი” – დღე, როცა დატოვებდით სკოლის კედლებს და შეაბიჯებდით ცხოვრების ახალ და საინტერესო ეტაპზე. თუმცა, აქამდე არნახულმა გამოწვევამ, რომლის წინაშეც ახლა მთელი კაცობრიობა დგას, სწავლის დასკვნით ეტაპზე თქვენს სკოლებს, საყვარელ მეგობრებსა და მასწავლებლებს დაგაშორათ.
მიუხედავად ყველაფრისა, თქვენ შეძელით, გამკლავებოდით იმ გამოწვევებს, რაც თან ახლდა დისტანციურ სწავლებას და გამარჯვებულები ამთავრებთ სკოლას”, – განაცხადა მინისტრმა.
ავტორი: მარიამ ტიელიძე
