სამყაროში არაერთი პროფესია არსებობს. ზოგიერთი მათგანის შინაარსი და დანიშნულება არცთუ ისე გარკვეულია ყველასთვის. რას ნიშნავს პროფესია „სომელიე“? საქართველოში ეს საქმიანობა განსაკუთრებულად საჭიროა და მნიშვნელოვანი.

სომელიე ღვინის ექსპერტია, ღვინის მცოდნე. ის გახლავთ შუამავალი ალკოჰოლური სასმელების მწარმოებლებსა და მომხმარებელთა შორის. მას ევალება, იყოს გათვითცნობიერებული შესაბამის ტექნოლოგიებში, ერების ეთნოგრაფიკაში, ადგილობრივ კულტურებში და ა.შ. სომელიე არის სტატუსი, რომლის მისაღებადაც კონკრეტული პროცედურა მოქმედებს. ამ წოდების მისაღებად საჭიროა, ადამიანმა ჩააბაროს როგორც საერთაშორისო გამიცდა, ისე მეორე – საქართველოს სომელიეთა ასოციაციის გამოცდა.

საქართველოს სომელიეთა ასოციაციის პრეზიდენტი, შალვა ხეცურიანი დეტალებზე საუბრობს.

სომელიეს კომპეტენცია რას ითვალისწინებს?

ყველაზე მთავარი არის ცოდნა. ცოდნა ქვეყანაზე, რეგიონზე, კონკრეტულ მწარმოებლებზე, კონკრეტულ ღვინოებზე, ტექნოლოგიებზე, სასმელებზე, კულტურაზე, ადგილობრივ ტრადიციებზე და ა.შ. ეს არის უმნიშვნელოვანესი და, რაც მთავარია, გასტრონომიაზე. ეს უკანასკნელი იმიტომ, რომ სომელიე, ასევე, არის ადამიანი, რომელიც რეგიონების გასტრონომიასა და გასტრონომიულ ტრადიციებში უნდა ერკვეოდეს კარგად. მეორე, რა თქმა უნდა, ტექნიკური უნარები, ბუნებრივია – დეგუსტაციის. ეს ყველაფერი სწავლებადია და ხელის შემშლელი არაფერი არსებობს. რაღაც უიშვიათესი დაავადება არსებობს, როდესაც ადამიანი არომატებს ვერ არჩევს, მაგრამ ეს ძალიან იშვიათია, ასე რომ, სინამდვილეში, ხელის შემშლელი არაფერია.

ამ დროისთვის, ამ სფეროს ყველაზე დიდი პრობლემები და გამოწვევები რა არის?

ამ დარგში ყველაზე დიდი პრობლემა არის განათლება. ეს არის ყველაზე დიდი გამოწვევა. ვგულისხმობ ამ ბიზნესში დაკავებული ადამინების ყველა დონის განათლებას. მათ შორის, მევენახეობასთან დაკავშირებული განათლება კიდევ უფრო დიდი პრობლემაა. ეს იმიტომ, რომ ღვინის 90 % იქმნება თვითონ ვენახში. ეს გვაქვს ჩვენ პრობლემად როგორც ადგილების შერჩევის, ასევე – ნიადაგის შერჩევის, სწორი საძირეების, ნერგების, გაშენების, მოვლის და სხვა მიმართულებებით. ეს იმიტომ, რომ ყველაფერი, რასაც დღეს ჩვენ ვაკეთებთ, არის კოლმეურნეობების ინერცია, რეალურად, და სულ რამდენიმე იშვიათი გამონაკლისის გარდა მაინც ამ ინერციას მივყვებით.

როგორც ყველა სხვა დარგი საქართველოში, სომელიეს პროფესიაც შესაბამისი კადრების მუდმივ გადამზადებასა და ცოდნის გაღრმავებას მოითხოვს. სხვა დარგის სპეციალისტების მსგავსად, სომელიესაც ყოველთვის უნდა ჰქონდეს პასუხი თავის სფეროსთან დაკავშირებულ ყველა შეკითხვაზე. მან უნდა უზრუნველყოს, რომ მომხმარებელს, რაც შეიძლება, მაღალი ხარისხის მომსახურება გაუწიოს და მაქსიმალურად კარგი და კომფორტული მომსახურება შესთავაზოს. რაც უფრო კომუნიკაბელურია ის, მით მეტად წარმატებულია მისი კარიერა. ურთიერთობისა და დიალოგის უნარი სომელიესთვის ერთ-ერთი უმთავრესი მახასიათებელია.

ავტორი: მარიამ ტიელიძე

Please follow and like us: