ზუკა ხუციშვილი, მისი ხმა, კლიპები, სიმღერები ბევრს ადრეული ბავშვობიდან ახსოვს. არცთუ ისე ცოტა წლის წინ ზუკამ ძალიან ბევრ ადამიანს შეაყვარა თავი. ეს ადამიანები დღესაც მისი გულშემატკივრები არიან.
არც კი ახსოვს, როგორ დაიწყო მისი მაგიური სამყარო. უყვებოდნენ, რომ აყვებოდა ხოლმე სხვების ნამღერს ჯერ კიდევ მაშინ, როდესაც ძალიან პატარა ასაკის იყო. მუსიკალურ ოჯახში გაიზარდა, სხვანაირად, ვერც გამოვიდოდა. ბევრისთვისაა საინტერესო, რას საქმიანობს ზუკა ხუციშვილი დღეს და როგორია მისი გეგმები. “თბილისი თაიმსს” ის თავად ესაუბრა.
ზუკა, დღეს მუსიკალური მიმართულებით რას საქმიანობ?
დღეს ყველა სფეროსთვის ძალიან რთული პერიოდია. ამ მხრივ არც მუსიკალური სფერო გამოირჩევა. გვყავს ცოცხალი ბენდი, ძალიან ნიჭიერი ადამიანების შემადგენლობით. წელიწადზე მეტია, რაც დაარსდა. შარშან ბენდისთვის ძალიან კარგი პერიოდი იყო, ვიყავით შემართებით. ახლაც, რა თქმა უნდა, ველოდებით საშუალებას, რომ დავუბრუნდეთ ძველ ცხოვრებას. ჩვენც, ცხადია, გავაგრძელებთ საქმიანობას.
ამას გარდა, რით ხარ დაკავებული?
წლების მანძილზე ვიყავი საგარეო საქმეთა სამინისტროს თანამშრომელი. პროფესიით დიპლომატი ვარ. დიდი გამოცდილება და ძალიან ბევრი მეგობარი შევიძინე ამ მხრივ. ბევრი ვისწავლე, ჩემთვის დიდი სკოლა იყო. თუმცა, ამ ეტაპზე სხვანაირი პერიოდია – ყველასთვის ყველაფერი გაურკვევლობაა. ვფიქრობ სხვა საქმეებზეც, მაგრამ მუსიკა ჩემი ძალიან დიდი ნაწილია.
რა ადგილი აქვს მუსიკას შენს ყოველდღიურობაში?
ის არ არის არც ჩემი ჰობი, არც საქმიანობა. უბრალოდ, ის არის, რითაც დავიბადე – ვერ დავარქმევ სახელს, რას ნიშნავს მუსიკა ჩემთვის. რომც მინდოდეს, ჩემს ამ ნაწილს ვერ გავექცევი.
მუსიკა ჩემი პიროვნების განუყოფელი ნაწილია. არ არსებობს სიტყვა, რაც შეიძლება, დავარქვა მას. ის არის ჩემთვის განუყოფელი და მანიჭებს დიდ ბედნიერებას.
ამ მიმართულებით როგორ შეაფასებ შენს უკვე განვლილ გზას?
ისე გამოვიდა, რომ ღმერთმა მარგუნა ნიჭი, რომელიც მაქვს და რომელიც ბევრ ქართველს აქვს, ჩემი ოჯახის მადლობელი ვარ, რომ ნელ-ნელა დავიწყე პროფესიონალურად სიმღერა. მაგრამ, რა თქმა უნდა, კიდევ ბევრი წელია საჭირო. რამდენიც უნდა გავაკეთო ცხოვრებაში, ვფიქრობ, რომ მეტი შეიძლება. მემგონი, ჯერ მუსიკაში იმდენი არ გამიკეთებია, რაც ვფიქრობ, რომ სამომავლოდ არის შესაძლებელი.
რა არის შენი უახლოები გეგმები?
პანდემიის დროს ჩავწერეთ რამდენიმე სიმღერა. გვინდა, რომ კარგი პრემიერები გავაკეთოთ. ცხადია, დისტანციურად. ვნახოთ, როგორ განვითარდება მოვლენები და როგორი რეგულაციები იქნება. ძალიან დიდი იმედი მაქვს, რომ ახალი წლებისთვის მე და ჩემი ბენდი ისევ შევიკრიბებით და რამდენიმე ლამაზ საღამოს გავაკეთებთ.
მასალა მოამზადა : მარიამ ტიელიძემ
