ზოგჯერ ადამიანს აქვს შესაძლებლობა, გადაარჩინოს სხვა ადამიანის სიცოცხლე. ეს არის პროცესი, რომელიც უანგაროდ მიმდინარეობს. პროექტი „სისხლის უანგარო დონორები“ უკვე რამდენიმე წელია, დიდებულ საქმეს ემსახურება. უფრო დეტალურად, რაზეა ის ორიენტირებული და რა სერვისებს სთავაზობს ადამიანებს – „თბილისი თაიმსს“ მისი დამფუძნებლები ესაუბრნენ.
როდის დაარსდა პროექტი „სისხლის უანგარო დონორები“?
სოციალური პროექტი “სისხლის უანგარო დონორები”, 2017 წელს მოხალისეობრივად დავიწყეთ. თავდაპირველად გვქონდა მხოლოდ Facebook გვერდი, რომელსაც მხოლოდ ინფორმაციის სწრაფად გავრცელებისთვის ვიყენებდით და ადამიანებს ამ კუთხით ვეხმარებოდით. თუმცა, პანდემიის პერიოდში, როდესაც ყველამ უფრო ნათლად გავაცნობიერეთ, თუ რაოდენ მნიშვნელოვანია ადამიანების ჯანმრთელობა, გადავწყვიტეთ, უფრო დიდი ყურადღება და ენერგია დაგვეთმო ამ პროექტისთვის და შევქმენით ბაზა, რომელშიც ადამიანები, რომლებიც მზად არიან, გახდნენ უანგარო დონორები, სურვილისამებრ რეგისტრირდებიან.
რა იყო მიზანი, რის გამოც დაფუძნდით?
ჩვენი მთავარი მიზანი ყოველთვის იყო, დაგვეკავშირებინა სისხლის საჭიროების მქონე ადამიანები უანგარო დონორებთან. სამწუხაროდ, სისხლის დონაციის მნიშვნელობა საქართველოში არ იყო ფართოდ გავრცელებული, რის გამოც ზოგჯერ შემთხვევაში ფატალურად მთავრდებოდა. ამისათვის გადავწყვიტეთ ჩვენი პროექტის დაწყება, რომ ადამიანებმა ხმის გაუვრცელებლობის, სისხლის ბანკებში საჭირო ჯგუფის სისხლის არქონის, ან ინფორმაციული ვაკუუმის გამო არ დაკარგონ ოჯახის წევრები, თუ ახლობლები. ჩვენი მთავარი სურვილია, რომ საზოგადოებამ გაითავისოს და გაიაზროს, თუ რაოდენ მნიშვნელოვანია სისხლის დონაცია და რომ ამით შეუძლიათ სამ ადამიანს, პირდაპირი მნიშვნელობით სიცოცხლე შეუნარჩუნონ.
უფრო დეტალურად, რას ითვალისწინებს თქვენი საქმიანობა?
ჩვენი საქმიანობა ემსახურება სისხლის საჭიროების მქონე პიროვნების ან მათი ახლობლის პირდაპირ დაკავშირებას დონორთან. ამისათვის შევქმენით ბაზა, რომლის საშუალებითაც მარტივად შეგვიძლია შესაბამისი დონორის მოძიება. რაც ყველაზე მთავარია, ჩვენს ბაზაში დარეგისტრირებული დონორები სისხლს გასცემენ სრულიად უანგაროდ. ამაში რა თქმა უნდა მთავარ როლს ის ადამიანები ასრულებენ, რომლებიც ჩვენთან რეგისტრირდებიან მზად არიან, ნებისმიერ დროს მათი წვლილი შეიტანონ სრულიად უცხო ადამიანის სიცოცხლის გადარჩენაში. ჩვენი მთავარი საქმიანობა დონორების მოძიება, იმფორმაციის გავრცელება და შესაბამისი პირების ერთმანეთთან დაკავშირებაა.
მასალა მოამზადა : მარიამ ტიელიძემ
Discussion about this post