მსოფლიოს ქვეყნების გარკვეულ ნაწილში ვაქცინაცია აქტიურად მიმდინარეობს. საქართველოში, მიუხედავად იმისა, რომ მოლოდინი დიდი იყო, პროცესი არცთუ ისე აქტიურია – მოსახლეობა, მეტნაკლებად, თავს იკავებს.
ჩვენს ქვეყანაში საზოგადოებას უკვე აქვს შესაძლებლობა, არჩევანი ორ ვაქცინას – “ასტრაზენეკასა” და “ფაიზერს” შორის გააკეთოს.
უფრო დეტალურად, არსებულ რეალობას “თბილისი თაიმსთან” საუბრისას პროფესორი, ექიმი-თერაპევტი, მაკა ბულეიშვილი აფასებს.
“ძალიან მნიშვნელოვანია ის ფაქტი, რომ ადამიანს უკვე აქვს საშუალება, რომ მან არჩევანი გააკეთოს ორ ვაქცინას შორის. “კოვაქს” პლატფორმასთან მიმდინარეობას დამატებით მოლაპარაკებები და კიდევ შემოვა როგორც “ასტრაზენეკასა” და “ფაიზერის” დამატებითი დოზები, ისე – სხვა ვაქცინებიც. საუბარია “სინოვაქსზე”. ყველა ვაქცინას, რომელიც საქართველოში შემოდის და შემოვა, ჯანდაცვის მსოფლიო ორგანიზაციის მიერ ექნება გაწეული რეკომენდაცია.
თავიდან მოლოდინი იყო ძალიან მნიშვნელოვანი იმ თვალსაზრისით, რომ მსოფლიოში პანდეემიის დასასრულებლად აუცილებელია ვაქცინაცია. თუკი მოსახლეობის 60+65 % იქნება ვაქცინირებული, შევძლებთ პანდემიასთან გამკლავებას”, – განმარტავს ექიმი.
როგორც ის აღნიშნავს, მოსახლეობამ არ უნდა მიიჩნიოს, რომ რადგან ვაქცინაციის პროცესი დაწყებულია, მან უარი უნდა თქვას რეკომენაციების დაცვაზე – აუცილებელია, დავიცვათ ჰიგიენის ნორმები.
“მნიშვნელოვანია, რომ მოხდეს ვაქცინაციის პროცესის გააქტიურება. მოსახლეობას უნდა მიეწოდოს ინფორმაცია მისი აუცილებლობის შესახებ. ადამიანებს უნდა გაეცეთ პასუხები არსებულ შეკითხვებზე. ეს აბსოლუტურად ნორმალურია, რა თქმა უნდა, ელემენტარული მედიკამენტის მიღების შემთხვევაშიც, ასევე, სუნამოც მოხმარების, საკვების მიღების დროს შეიძლება, ორგანიზმში განვითარდეს სხვადასხვა სახის რეაქცია – განსაკუთრებით, ალერგიული. ვაქცინაციის წინ ტარდება იმ პირის დეტალური გამოკითხვა, ვისაც უნდა ჩაუტარდეს ვაქცინაცია. ეს კითხვები დეტალურად უნდა იქნას გავლილი”, – განმარტავს მაკა ბულეიშვილი.
როგორც ექიმი ამბობს, 65 წელს ზემოთ ადამიანებს განსაკუთრებულად ახასიათებთ თანმხლები დაავადებები და არ უნდა დაგვავიწყდეს, რომ ისინი რისკ ჯგუფს წარმოადგენენ კორონავირუსით დაინფიცირების მხრივ – “ვაქცინაცია არის ერთადერთი საშუალება იმისთვის, რომ დავიცვათ 65 წელს ზემოთ მყოფი, ქრონიკური დაავადებების მქონე ადამიანები”.
“როგორც ვიცით, ორივე ვაქცინას აქვს პროცენტული მაჩვენებელი. უფრო მაღალი – “ფაიზერს”, შედარებით ნაკლები – “ასტრაზენეკას”. უმნიშვნელოვანესია, როცა ჩვენ ამ ორ ვაქცინას ვადარებთ ერთმანეთს, გავითვალისწინოთ, რომ მათი მწარმოებლები ძალიან მაღალი რანგის ქვეყნებია და, ასევე, ის, რომ ორივე ჯანმო-ს მიერ არის რეკომენდებული.
მე იმედი მაქვს, რომ, თანდათანობით, მოსახლეობა გაერკვევა დეტალებში. შეკითხვები, ცხადია, არის და მათზე პასუხებია გასაცემი”, – აღნიშნავს პროფესორი.
მაკა ბულეიშვილი ხშირად დასმულ შეკითხვებსაც განიხილავს.
“თუ ადამიანს აქვს რაიმე ქრონიკური დაავადება და ის იმყოფება ამ დაავადების გამწვავების სტადიაში, მიზანშეწონილია, ეს დაავადება ჩაცხრეს და შემდეგ მოხდეს ვაქცინაცია.
ასევე, ხშირია შეკითხვები მედიკამენტების მიღებასთან დაკავშირებით – მიზანშეწონილია თუ არა წინა დღეებში რაიმე სახის მედიკამენტის მიღება. როდესაც ადამიანი მიდის ვაქცინაციაზე, უმჯობესია, ერთი დღით ადრე არანაირი მედიკამენტი არ ჰქონდეს მიღებული. თუმცა, თუ აუცილებელი და გარდაუვალია – არსებობს მედიკამენტები, რომელთა მიუღებლობა ადამიანისთვის არ შეიძლება – ექიმთან დეტალურად უნდა გაიაროს ამ ინფორმაციის შესახებ”, – განმარტავს მაკა ბულეიშვილი “თბილისი თაიმსთა” საუბრისას.
მასალამ მოამზადა : მარიამ ტიელიძემ