რამდენად მნიშვნელოვანია ეკონომიკური კრიზისიდან თავის დასაღწევად მოსახლეობაში ვაქცინაციის პროცესის გააქტიურება? სხვა მრავალ კითხვასთან ერთად, ეს ერთერთია, რომელიც თავისთავად არის დაკავშირებული მასობრივ იმუნიზაციასთან.
აღნიშნულ საკითხზე “თბილისი თაიმსთან” კომენტარი გააკეთა არასამთავრობო ორგანიზაცია “საზოგადოება და ბანკების” ხელმძღვანელმა, გიორგი კეპულაძემ.
“დღეს, რეალურად, არამხოლოდ პანდემიის დაძლევისა და ადამიანების ჯანმრთელობაზე ზრუნვის მიმართულებით, არამედ, ქვეყანაში ეკონომიკური მდგომარეობის დასტაბილურების ხაზი სწორედ ვაქცინაციაზე გადის. რაც უფრო სწრაფად დავიწყებთ და დავასრულებთ ვაქცინაციის პროცესს და მოსახლეობის რაც შეიძლება დიდი ნაწილი აიცრება, მით უფრო სწრაფად შევძლებთ ქვეყნის ეკონომიკური მდგომარეობის გამოსწორებას.
რა თქმა უნდა, სრულად დასტაბილურება მოკლე პერიოდში ვერ მოხერხდება, მაგრამ ვაქცინაციის დაწყება და მოსახლეობის დიდი რაოდენობის მოცვა იქნება მნიშვნელოვანი ნაბიჯი იმისთვის, რომ ჩვენ კვლავინდებურად აღარ ჩავიკეტოთ, აღარ გვქონდეს ე.წ. ლოქდაუნები, აღარ დასჭირდეს მთავრობას ბიზნესის შეზღუდვა და “კომენდანტის საათი” და, რეალურად, გავხსნათ ქვეყანა ტურისტებისთვის”, – განაცხადა გიორგი კეპულაძემ.
მასალა მოამზადა : მარიამ ტიელიძემ
