რამდენად შესაძლებელია, გამოუყენებელი, უკვე მობეზრებული და უფუნქციო ნივთებისგან, ნაჭრებისგან შეიქმნას რაღაც ისეთი, რაც სასიამოვნოდ გაგვაკვირვებს მოულოდნელობისგან? სოციალური საწარმო 7R სწორედ ამ შედეგზეა ორიენტორებული. მისი გუნდის მიზანია, ძველისგან შექმნას ფუნქციური. ამასთან, განსაკუთრებულად მნიშვნელოვანია, რომ ის გარემოს დაცვას უდიდეს მნიშვნელობას ანიჭებს.
სწორედ აღნიშნული საწარმოს დამფუძნებელი, მარი ბენდელიანი პასუხობს “თბილისი თაიმსის” შეკითხვებს.
კონკრეტულად რას საქმიანობს სოციალური საწარმო 7R?
სოციალურ საწარმო 7R -ს აქვს ძალიან ამბიციური გეგმები. შეიძლება ითქვას, ეს საწარმო არის სხვადასხვა იდეის ნაკრები. საბოლოოდ, მივიღეთ ასეთი სტრატეგია – გვინდა, რომ სამ წელიწადში ქალაქ ზუგდიდში შევქმნათ მულტიფუნქციური სივრცე, სადაც იქნება მინიმუმ სამი სახელოსნო – ნულოვანი ნარჩენის იდეის მატარებელი კაფე, მაღაზია, საერთო სამუშაო სივრცე და აუცილებლად – ნარჩენების შეგროვებისა და სეპარაციის კუთხე.
შემოდგომას გვინდა, ელექტრონული მოწყობილობების აღდგენის სახელოსნო გავაკეთოთ. ამ სხვადასხვა სივრცეს გააერთიანებს შემდეგი – ვიზრუნოთ ნარჩენების შემცირებაზე, რაღაცების ხელახლა გამოყენებახე, გადამუშავებაზე და ა.შ.
რა მიზანზე ხართ ოროენტირებულნი?
მიზანი არის ის, რომ რაც შეიძლება ნაკლები ზიანი მიადგეს გარემოს, დაიზოგოს ბუნებრივი რესურსები და ყველაფერი ნაგავში არ გადავყაროთ.
იქედან გამომდინარე, რომ ეს არის სამწლიანი გეგმა – სხვადასხვა გრანტისა და ინვესტიციის საშუალებით ვგეგმავთ ამის განხორციელებას. პირველ ეტაპზე, მოპოვებული გრანტით, გავხსენით სამკერვალო სახელოსნო. აქ მცირე ნაჭრებისგან, მეორადი ტანსაცმლისგან, მორჩენილი ნაჭრებისგან იქმნება რაღაც ახალი, ფუნქციური, პრაქტიკული და ტრენდული.
საზოგადოების დამოკიდებულება როგორია თქვენ მიმართ?
ჩვენ ეს სოციალური საწარმო გრანტის მიღებამდე ჩავუშვით და გავაცანით ჩვენს მეგობრებს, საახლობლო წრეს. იდეა ყველას ძალიან მოეწონა. საახალწლოდ დავდეთ ძველი პერანგებისგან შექმნილი ქვედაბოლოები, რომლებსაც განსაკუთრებულად დიდი გამოხმაურება მოჰყვა. სულ ელოდებიან, როდის შეძლებენ მათ შეძენას.
რეალურად, ფუნქციონირება ჩვენ სულ რამდენიმე დღეა, რაც დავიწყეთ. ახლა ვაბარებთ პირველ შეკვეთას. იმედი გვაქვს, ტექნიკურად იმდენად დავიხვეწებით, რომ შევძლებთ ინდივიდური შეკვეთებით შეკერვას.
მასალა მოამზადა : მარიამ ტიელიძემ