დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ქვეყანაში მასობრივი ვაქცინაცია სავარაუდოდ, ივლისში დაიწყება. ამ თემაზე მან სპეციალურ ბრიფინგზე ისაუბრა და მოსახლეობას კიდევ ერთხელ მოუწოდა მაქსიმალურად დაიცვან რეკომენდაციები, რადგან ქვეყანაში ეპიდემიოლოგიური მდგომარეობა უარესდება.
მისი თქმით, ქვეყანაში 17 კლასტერია და ყველა მათგანი წვეულებებიდან დაიწყო.
“მოგეხესენებათ, რომ დღევანდელი დღით გვაქვს დაახლოებით 17-მდე კლასტერული ეპიდაფეთქება ქვეყანაში, რომელიც მართვადია, პირდაპირ გეტყვით, მაგრამ ეს არის პირველი ნიშანი იმისა, რომ თუ არ იქნა რადიკალური ზომები მიღებული და არ მივყევით რეკომენდაციებს, დაიწყოს საყოველთაო გავრცელება. […]
მასობრივი აცრები ჩვენთან დიდი ალბათობით დაიწყება ივლისში, როცა გვექნება შესაბამისი დოზები, სულ მცირე, მარაგში გვექნება ყოველთვის ნახევარი მილიონი დოზა ვაქცინისა”, – თქვა ამირან გამყრელიძემ.
გამყრელიძის განცხადებით, თუ ყოველდღიურად 3-4 ათასი კორონავირუსის საწინააღმდეგო აცრა გაკეთდება, მაშინ მარტ-აპრილ-მაისში გარკვეული “საზოგადოებრივი იმუნიტეტი” შეიქმნება.