ბევრისთვის ძალიან საინტერესო და მაგიურიც კია საკითხები, რომლებიც ასტრონომიას ეხება. სწორედ ამ მიმართულებით, ჩვენს ქვეყანაში არსებობს საქართველოს ასტრონომიის კლუბი. სხვადასხვა აქტივობის მეშვეობით, კლუბი მეცნიერების პოპულარიზაციას ცდილობს.
დეტალურად, რა მიზანზეა ის ორიენტირებული – „თბილისი თაიმსის“ შეკითხვებს ნიკუშა ცქიტიშვილი, საქართველოს ასტრონომიის კლუბის დამფუძნებელი და სამეცნიერო ღონისძიებების ხელმძღვანელი პასუხობს.
რამდენი ხანია, რაც არსებობს საქართველოს ასტრონომიის კლუბი?
დაახლოებით, 2005 წლიდან იმართებოდა ღონისძიებები არაოფიციალურად. თუმცა, ოფიციალური სახით 5 წლის წინ დაარსდა.
რა ძირითად აქტივობებს გულისხმობს ის?
ძირითადი აქტივობები არის გასვლები იპოდრომზე ტელესკოპით, ცაზე თანავარსკვლავების ჩვენება ლაზერებით. ასევე, ვატარებთ პოპულარულ ლექციებს.
სკოლებში ასტრონომია არ ისწავლება და ტელესკოპთან შეხება ბავშვებს არ აქვთ. წარმოდგენაც კი არ აქვთ, რა არის ასტრონომია. ჩვენ ამით ვცდილობთ მეცნიერების პოპულარიზაციას.
პანდემიის პერიოდში რას საქმიანობს კლუბი?
კორონავირუსის პერიოდში, ძირითადად, შემოვიფარგლებით ონლაინლექციებით. ამჟამად, სხვას ვერაფერს ვაკეთებთ. თუკი ძალიან მნიშვნელოვანი მოვლენა ხდება, შესაძლოა, გავაკეთოთ ჩართვა და ვაჩვენოთ პირდაპირ ეთერში.
რეგიონებს თუ მოიცავთ?
ამ ზაფხულს გვქონდა ასტროფესტივალი 6 ქალაქში: თბილისი, ქუთაისი, ოზურგეთი, გორი, თელავი და ბათუმი. ის ჩატარდა შოთა რუსთაველის სამეცნიერო ფონდის დაფინანსებით. დავდგით ლაზერშოუ, ვაჩვენეთ თანავარსკვლავედები, გვქონდა პოპულარული ლექციები, პრიზები. გვქონდა ასევე დღის ტელესკოპიც. ისე დავამთხვიეთ, რომ ჩანდა სავსე მთვარე და პლანეტები – სატურნი, იუპიტერი და მარსი – ეს გაკეთდა რეგიონებში პოპულარიზებისთვის. წამოვიდა მოთხოვნაც, დაიწერა სახელმძღვანელო.
ამას გარდა, ჩვენ გვაქვს ფეისბუქგვერდი და საიტი – astronet.ge, რომელიც ამ მიმართულებით ერთადერთია ქართულ სივრცეში.
მასალა მოამზადა : მარიამ ტიელიძემ
