ბუნებრივი გაზი თბილისი ენერჯის მომხმარებლებისთვის დაახლოებით 8 თეთრით გაძვირდა. შესაბამისი გადაწყვეტილება სემეკმა რამდენიმე წუთის წინ მიიღო. სამომხმარებლო ტარიფების ზრდა თავად კომპანიის მოთხოვნით მოხდა.
შედეგად 1 ივნისიდან ქვეყანაში ახალი ტარიფი იმოქმედებს და 1 კუბური მეტრი ბუნებრივი აირი 46.138 თეთრის ნაცვლად 53.972 თეთრი ეღირება.
ტარიფის ცვლილება გამოიწვია ტარიფის ერთ-ერთი კომპონენტის- გაზის მიწოდების ზღვრული ტარიფის ცვლილებამ, რომელიც 26.810 თეთრიდან 33.449 თეთრამდე გაიზარდა. ტარიფის ცვლილების ძირითადი მიზეზი ლარის კურსი გახდა. 2019 წელს დადგენილი ტარიფში ლარის კურსი დოლართან მიმართებით 2.97-იან ნიშნულზე იყო, დღეს მიღებულის გადაწყვეტილებით კი ტარიფში ლარის კურსი 3.37-იან ნიშნილზე გაითვალისწინეს.
ახალი ტარიფები 1 ივნისისან 2023 წლის 1 იანვრამდე იმოქმედებს.
ტარიფის ზრდის მოთხოვნით სემეკს “თბილისი ენერჯიმ” 2021 წლის თებერვალში მიმართა. კომპანიამ მარეგულირებელ კომისიას წარუდგინა ინფორმაცია იმის თაობაზე, რომ მათ ტარიფში ასახხული კურსის გამო 23 მილიონი ლარის ზარალი მიიღეს, სწორედ ამ ზარალის კომპენსირებისთვის და მომავალში ახალი ზარალის თავიდან ასაცილებლად შეცვალა სემეკმა სამომხმარებლო ტარიფი.
სემეკის წევრთა განცხადებით, მათ ტარიფის ცვლილება ახლა არჩიეს, რადგანაც თუკი მისი კორექტირება ზამთარში მოხდებოდა, ეს მომხმარებლებზე უფრო მტკივნეულად აისახებოდა.
გამართულ სხდომაზე “თბილისი ენერჯის” წარმომადგენელმა დააფიქსირა პოზიცია, რომ გაცვლითი კურსის რისკის შესამცირებლად სწორი იქნებოდა თუკი სემეკი გამანაწილებელი კომპანიებისთვის გაზის მიწოდების ფასდადებას ლარებში განსაზღვრავდა. ამჟამად “თბილისი ენერჯი” 1000 კუბურ მეტრ გაზს სახელმწიფოს კუთვნილი “ნავთობისა და გაზის კორპორაციისგან” 86 დოლარად იღებს და ეს ტარიფი 2019 წლის ბოლოდან მოქმედებს.
