როგორ უნდა დავიცვათ ჩვენი საბანკო ანგარიშები და როგორ ვებრძოლოთ კიბერთაღლითობას – ეს არის საკითხი, რომელიც დღესდღეობით მოსახლეობის ძალიან დიდი ნაწილისთვის არის საინტერესო. გამომდინარე იქედან, რომ პლასტიკური ბარათებისა და ონლაინგადახდების საუკუნეში ვცხოვრობთ, არსებობს რეკომენდაციები, რომლებიც საჭიროა, აღნიშნულ საკითხთან დაკავშირებით ვიცოდეთ.
თემის შესახებ „თბილისი თაიმსს“ „საზოგადოება და ბანკების” დამფუძნებელი, გიორგი კეპულაძე ესაუბრა.
„ნებისმიერ მომხმარებელს, რომელმაც შეიძლება, საკუთარი პირადი მონაცემები, ნებსით თუ უნებლიედ, გადასცეს სხვა ადამიანს, შეიძლება, შეექმნას საფრთხე და მან დაკარგოს თანხები. ამიტომ, გარკვეული პრევენციული ზომებია მისაღები, რადგან ძალიან ბევრს შეემთხვა მსგავსი შემთხვევა. ბოლო დროს ამის შესახებ საჯაროდ ბევრი წერს.
დღეს, ფაქტობრივად, ჩვენი გადახდების 95 % მაინც გადასულია ინტერნეტსივრცეში. შესაბამისად, თაღლითებისა და ჰაკერების ყურადღება უფრო მეტად გადართულია ინტერნეტით თანხების მოპარვაზე. ისინი იგონებენ ათასგვარ ხერხს, ხრიკს. ზოგჯერ “მეილს” წერენ, რომ კონკრეტულმა ადამიანმა მოიგო თანხა ლატარიაში და ამისთვის მისი პირადი მონაცემებია საჭირო. ბოლო დროს ძალიან პოპულარული იყო კონკრეტული კომპანიების სახელების ხსენება, თითქოს, მათ ჰქონდათ იუბილე და ა.შ. სამწუხაროდ, ისეც ხდება ხოლმე, მომხმარებელთა ნაწილი ვერ ხვდება, რომ საქმე აქვს თაღლითობასთან და ისინი ებმებიან მახეში“, – აღნიშნავს კეპულაძე და მომხმარებლებს რჩევებს აძლევს, როგორ უნდა მოვიქცეთ, რომ თაღლითობის მსხვერპლი არ გახდნენ.
„იმისთვის, რომ არ მოვხვდეთ თაღლითების ხელში, მნიშვნელოვანია, ჩვენი მონაცემები და პირადი ანგარიშები იყოს მაქსიმალურად დაცული. რა თქმა უნდა, თავის მხრივ, ბანკები იცავენ მასშტაბური ჰაკერული თავდასხმებისგან, მაგრამ თუ ჩვენ ბარათის მონაცემებს ვინმეს გავუმხელთ, შემდეგ უკვე ბანკისთვის ძალიან რთულია, რომ ჩვენი ანგარიში დაიცვას არასასურველი ტრანზაქციისგან.
ამიტომ, ძალიან მნიშვნელოვანია, კარგად დავაკვირდეთ მიღებულ შეტყობინებებს, იქნება ეს სოციალური ქსელი თუ ელ. ფოსტა. არ გადავიდეთ ისეთ ვებგვერდებზე, რომლებსაც არ ვენდობით; არ შევიყვანოთ ჩვენი მონაცემები ასეთ ვებგვერდებზე.
არის შემთხვევები, როდესაც ადამიანები საფულეში ინახავვენ ბარათს და მასთან ერთად – შესაბამის პინ კოდს.
ხდება ისეც, რომ თაღლითები აკეთებენ კლონირებულ გვერდებს, რომლებიც ძალიან ჰგავს რომელიმე ბანკის ვებ გვერდს. შესაძლოა, სხვაობა მხოლოდ ერთი ასობგერა იყოს და ვიზუალიც ძალიან ჰგავდეს. ამან შეიძლება, ძალიან ბევრი ადამიანი შეცდომაში შეიყვანოს, მაგრამ თუ აღმოვაჩენთ, რომ ჩვენი მონაცემები არასასურველ ვებგვერდზე დავაფიქსირეთ, მაშინ ჯობს, ასეთი ბარათი საერთოდ დავბლოკოთ და დავუკავშირდეთ ჩვენს მომსახურე ბანკს, რომ მათ დროულად მოახდინონ რეაგირება, დაბლოკონ ჩვენი ბარათი, რათა ავიცილოთ თავიდან უსიამოვნო შედეგები. როგორც წესი, ასეთი შემთხვეევების გამოძიება არის ძალიან რთული“, – განმარტავს გიორგი კეპულაძე „თბილისი თაიმსთან“ საუბრისას.
მასალა მოამზადა : მარიამ ტიელიძემ
