ბავშვებისთვის სწორი და ჯანსაღი კვება განსაკუთრებულად მნიშვნელოვანია. გემოვნების შესაბამისად, ზოგიერთ ბავშვს ზოგიერთი საკვები არ მოსწონს, როგორც წესი, მშობლებს ყოველთვის ურჩევენ, რომ ის იყოს ფერადი და ხალისიანი.
სწორედ ასეთია პროდუქცია, რომელსაც “ყლაპ-ყლუპ” გვთავაზობს.
დეტალებზე “თბილისი თაიმსს” დეკო ხიდაშელი ესაუბრა.
“პატარა ასაკიდანვე ვამზადებდი პილმენსა და ხინკალს. როდესაც გავიზარდე, მივხვდი, რომ კულინარიით გატაცება ჩემთვის მხოლოდ გართობა არ იყო და კულინარიულ აკადემიაში ჩავაბარე. პანდემიის პერიოდში, როდესაც კიდევ უფრო აქტუალური გახდა ჯანსაღი კვების საკითხი, გადავწვიტე სტარტაპი შემექმნა და ბავშვობის ჰობი ბიზნესად გადამექცია. ასე შეიქმნა „ყლაპყლუპი“.
რატომ გაჩნდა ფერადი ნახევარფაბრიკატების იდეა?
მინდოდა, კომბინირებული და ფერადი საკვები შემექმნა ბავშვებისთვის, რომლებსაც ან ბოსტნეული არ უყვართ ან ხორცი. შედეგად, ძალიან გემრიელი და სასარგებლო პროდუქტი მივიღეთ, რომელზეც არცერთი პატარა ამბობს უარს.
რისგან იღებთ ცომის ასეთ ფერებს?
როგორც უკვე აღვნიშნეთ, ნახევარფაბრიკატებს მხოლოდ ჯანსაღი პროდუქტით ვამზადებთ. ცომის ფერებს რაც შეეხება, ეს ჭარხლის, ისპანახის და სტაფილოს წვენისგან მიიღწევა.
ფერადი ხინკლების გარდა, კიდევ რომელი პროდუქტია მოთხოვნადი?
ჩვენს მომხმარებლებს ძალიან მოსწონთ ბაჭიების ფორმის ვარენიკები, ხორციანი ბლინები, ზოლიანი პილმენები. მალე რავიოლს დავამატებთ მენიუში და იასამნისფერ პროდუქტსაც მალე შევთავაზებთ პატარებს.
„ყლაპ-ყლუპს“ თბილისში ჯერ მხოლოდ ერთი ობიექტი აქვს, თუმცა, ზამთარში შესაძლოა, მთის კურორტებზეც შეძლოთ ფერადი და გემრიელი „ყლაპ-ყლუპის“ დაგემოვნება.
